Dokkiefees HABITS OF GEN Z
Van ’n kykie na Generasie Z tot onthullings deur bekende sterre – maak seker dié dokumentêre reekse en flieks is op jou kyklys
Wonder jy soms hoe die jong mense se koppe werk? Of dalk is jy deel van dié generasie wat met hul anderste uitkyk op die wêreld die strukture van ons samelewing uitdaag en ontwrig.
M-Net ontsluit vir ons die enigmatiese wêreld van Generasie Z – gebore tussen 1997 en 2012. Skuif reg vir boeiende insigte en lewensuitkyke in die mini-dokkiereeks Habits of Gen Z. Die vyfdelige reeks sal plaaslike jong mense se lewens, invloede en aspirasies ondersoek.
Die TV-aanbieder Maps Maponyane, die akteur Siv Ngesi en die Afrikaanse TikTokker Aletta de
Kock is van diegene wat in die reeks kom gesels en hul menings deel.
Waldimar Pelser, M-Net se direkteur vir premiumkanale, beskryf die program as innoverend en dinamies.
“Habits of Gen Z is ’n boeiende dokkiereeks wat ons persepsies sal uitdaag en hopelik begrip tussen verskillende generasies sal bevorder.
“Dit is ’n ervaring wat jou oë sal oopmaak en hopelik tot betekenisvolle gesprekke in gesinne sal lei. Deur die gaping tussen generasies te oorbrug hoop ons as ’n kanaal om gesinne aan te moedig om saam te kom, meer oor mekaar te leer, en dit wat ons almal saambind te vier,” sê hy.
Openhartige gesprekke is in die reeks te sien oor waardes, identiteit, seks, dwelms, diversiteit, die verlede en die toekoms. Perspektiewe word gedeel van verwante stemme van reg oor die land, wat Gen Z tot Millenniërs verteenwoordig en ook Gen X en selfs ’n paar Baby Boomers. 2023. 5 EPISODES. 16. DONDERDAE OM 21:00 OP M-NET (DSTV-KANAAL 101). OOK OP DSTV CATCH UP EN DSTV STREAM BESKIKBAAR.
Saamgestel deur JODY-LYNN TAYLOR
Jy ken hom dalk as Rocky Balboa of John Rambo, maar die Amerikaanse akteur Sylvester Stallone se eie lewensverhaal kon in werklikheid netsowel ’n fliek gewees het.
Trouens, die nuwe Netflix- dokumentêre fliek handel net soveel oor sy lewe en loopbaan as oor die vele ikoniese karakters wat hy al oor die jare gespeel het.
Sly werp lig op die 77-jarige ster se moeilike kinderjare, wêreldwye roem en lewenslange berou.
Dit bevat ook insiggewende onderhoude met sy Rocky-medester Talia Shire, broer Frank Stallone jr. en mede-akteur Arnold Schwarzenegger wat oor hom gesels.
Sylvester se loopbaan, wat oor meer as 50 jaar strek, sluit onvergeetlike fliekreekse soos Rocky, Rambo en The Expendables in.
Hy het die ikoniese boksfliek Rocky (1976) self geskryf en toe ook die hoofrol vertolk en so sy visie verwesenlik. Dit was nommer een by die loket en het ’n Oscar gewen vir beste oorspronklike draaiboek, maar het nie sy pad makliker gemaak nie.
In Sly praat hy openhartig oor sy loketflops, en hoe die moeilikhede wat hy in sy beroep ervaar het hom net vorentoe gedryf het.
2023. 96 MIN. 13. OP NETFLIX BESKIKBAAR.