huisgenotjies
Stuur gerus oorspronklike grappies; jy kry R50 vir elkeen wat ons gebruik. Skryf aan Huisgenotjies, Posbus 1802, Kaapstad 8000 of grappies@huisgenoot.com en verstrek jou naam, adres, identiteitsnommer en bankbesonderhede (bank, taknaam, takkode en rekeningnommer). STADIGE VRYER
Koos en Saartjie gaan al twaalf jaar vas uit, maar sy wag steeds dat hy haar die jawoord moet vra.
Een Sondagmiddag terwyl die ou mense slaap, skraap Saartjie al haar moed bymekaar en vra: “Koos, moet ons nie maar trou nie?”
Hy kyk verbaas na haar en antwoord: “Maar wie sal nou in ons twee belangstel?”
CHARLOTTE PETERSEN
NIE ALWEER NIE
’n Boer, ’n Skot en ’n Engelsman stap by ’n kroeg in.
Die kroegman gee hulle een kyk en vra nors: “Wat is dit dié, die een of ander grap?”
LOUISE NOETH
BEURTKAMP
Eskom het my vir die res van my lewe van kampeer genees. Geen krag, geen TV, geen Wi-Fi, jy moet kosmaak oor ’n vuur . . .
En dan het jy nog nie eens by jou hek uitgery nie.
HESTER, NAMIBIË
DINK WEER
Mike aan Kallie: “Ek was baie naby daaraan om my vrou te los. Maar nadat ek vir so ’n halfuur aanlyn was, het ek baie beslis anders besluit.”
Kallie: “Hoe so?”
Mike: “Het jy gesien wat kos ’n skottelgoedwasser deesdae?”
WOLLIE, PRETORIA
EERLIK
Koos was by ’n ramparty. Effe gekletter ry hy huis toe, maar word deur ’n verkeersman voorgekeer. Dié steier terug van die walms toe Koos sy venster afdraai en hy gryp summier na die blaaspypie.
“Asseblief, moenie my laat blaas nie,” pleit Koos, “ek het twee bottels whiskey wat jy kan kry.”
“Meneer probeer jy my omkoop, ek is nie daardie soort nie,” sê die verkeersman streng.
Koos dink vinnig: “Goed, gee my R5 per botttel.”
Verkeersman: “Dankie, ek sal al twee vat.”
JOHAN H, GONUBIE
SLORDIG
Eva loop by die vyeboom verby en sien ’n klomp blare onder die boom lê.
Kwaai sê sy vir Adam: “Hoekom lê jou klere alweer die hele wêreld vol?”
SAN MARCHAND
MAAK REG WAT KROM IS
Al ou Mike se pelle was bly toe hy eindelik werk kry by ’n vrugtepakhuis. Maar toe word hy sommer ná die eerste dag afgedank . . .
Die rede: Hy het al die krom piesangs reguit gebuig.
ANTON, BELLVILLE
BABATAAL
Die kinderlose egpaar moes baie lank wag om ’n baba te kan aanneem en was oorstelp van vreugde om te hoor ’n Russiese wesie is beskikbaar.
Op pad terug van die aannemingsentrum af stop hulle eers gou by ’n plaaslike kollege om vir aandklasse in Russies in te skryf.
“Hoekom wil julle Russies leer?” vra die assistent terwyl sy hul registrasievorms nagaan.
Trots antwoord die nuwe pa: “Wel, wanneer ons baba begin praat, wil ons hom mos kan verstaan!”
LOUISE NOETH
HUWELIKSKWAAL
Die man kla van hoofpyn en sy vrou druk ’n koel lappie teen sy voorkop.
“Wie het voor ons getrou het lappies op jou voorkop gedruk,” vra sy koketterig.
“Niemand nie,” antwoord hy nors. “Voor ons huwelik het ek nie hoofpyne gekry nie.”
WOLLIE, PRETORIA