SHUDU HOU AAN INSPIREER
Die voormalige MEJ. SUID-AFRIKA spog met haar tweede KINDERBOEK én eie SWEMDRAGREEKS
SY VIND HAAR STEM
Shudufhadzo Musida, Mej. Suid-Afrika 2020, is as kind erg afgeknou toe sy na ’n nuwe provinsie verhuis het en ’n nuwe skool moes bywoon. Haar eerste kinderboek, Shudu vind haar sprankel, is twee jaar gelede gepubliseer en is deur dié afknouery geïnspireer. Die boek is in ses Suid-Afrikaanse tale, insluitend Afrikaans, beskikbaar.
Nou wil sy kinders help om hul eie stem te vind. Die skoonheidskoningin se tweede kinderboek, My naam is Shudu: Ek vind my stem, ek ken my waarde, is nou op die rakke.
“Dit is ’n boek oor identiteit, dapperheid, vergifnis, vriendskappe, die krag van gemeenskap, maar bowenal die krag van jou stem,” vertel sy. “Dit beskryf die stryd waardeur ek geestelik gegaan het met my selfbeeld, selfbewustheid en die afknouery wat ek verduur het.”
Die boek is gemik op kinders tussen ses en 10 jaar oud en is in vyf tale beskikbaar.
“Dis geskryf vir kinders, maar ek glo dis geskryf vir ons almal se innerlike kind.
“’n Mens is nooit te oud om iets te leer nie, en jy is nooit te oud om te genees nie.”
SY VIER VROUE
Haar eie swemdragreeks, Imbe, is net betyds vir die somer. Die naam is kort vir “Imbelani”, wat in Venda om te sing of te prys beteken. Imbe is in Julie in die Mej. Suid-Afrika-kompetisie se televisiereeks, Crown Chasers, bekendgestel toe die deelnemers ’n fotosessie in Mauritius gedoen het. “Ons wou hê vroue moet hul liggaam vier,” sê Shudu. “As iemand wat voorheen met liggaamsdismorfie geleef het, was dit moeilik om in ’n ruimte te wees waar dit gevoel het my liggaam word nie regtig verteenwoordig nie.
“Ek was in die modelbedryf en ’n liggaam soos myne is nooit regtig gesien nie.
“Ek het twee ongelooflike vroue op my pad ontmoet en het die swemdragreeks saam met hulle begin.” Imbe is dus ’n handelsmerk vir vroue deur vroue.
“Dit is ’n pragtige eerbetoon aan my Venda-kultuur, maar dit is ook ’n liefdeswerk vir alle vroue wat al ooit gevoel het hulle word nie verteenwoordig nie.”