BELEEF MY MAN ’N MANLIKE MENOPOUSE?
Die afgelope tyd doen my man die eienaardigste goed. Hy eet ewe skielik soetgoed, beplan elke naweek ’n ekskursie soos ’n kamp of ’n konsert, en toets nuwe motors by elke handelaar moontlik. Genadiglik het hy nog niks aangeskaf nie.
Die grootste verrassing is dat hy by ’n gim aangesluit het. Nou is hy vyfuur soggens op pad om te gaan oefen. Dít nou ’n man wat altyd so laat as moontlik gelê het.
Hy koop klere wat glad nie by hom pas nie, maar beweer dit laat hom goed en jonger lyk. Hy praat ook van dat dit dalk die ideale tyd is vir die eilandvakansie wat ons nog altyd wou meemaak.
Ons kinders is tieners en skud maar net hul kop oor hul pa. Wat moet ek nou van al dié dinge dink? Is hy besig met manlike menopouse? Hy is 49 jaar oud.
Baie mans gaan op daardie ouderdom deur hierdie fase. Daar is twee moontlikhede:
Manlike menopouse
Dit is nie ’n skielike verandering in testosteroonvlakke by mans nie. Verandering vind teen die pas van 1% per jaar plaas. Dit word nie die menopouse genoem nie – net vroue beleef dit.
Maar mans kan tog ’n soort verandering beleef wat hul gemoedstoestand beÏnvloed. Simptome het meestal nie met hormoonvlakke te doen nie, maar kan verband hou met stres, angs en depressie.
Dit sluit in:
■ Buie wat fluktueer
■ Lae energievlakke
■ Lae libido
■ Depressie
■ Swak slaap en altyd moeg
■ Swak konsentrasie
■ Soms swak geheue
■ Hy is ongemotiveerd
Middeljarekrisis
Dit is die tweede moontlikheid en dit gebeur wanneer mans hul 50’s bereik en begin besef die helfte van hul lewe is verby. Hulle raak dan angstig en bevraagteken alles wat hulle tot dusver in hul lewe bereik het. Hulle wonder ook oor wat hulle in hul beroep bereik het en voel dikwels hulle skiet ver te kort.
Nou wil hulle inhaal. Wat vir ons vreemd lyk, is vir hulle logiese optrede. Hulle begin dinge doen wat hulle gelukkig laat voel of ’n adrenalieninspuiting gee. Die risiko is dat hulle met ’n motorfiets uit hul jongmandrome by die huis kan aankom. Of ’n aktiwiteit aanpak wat gevaarlik is en jare se opleiding benodig, soos om Everest uit te klim.
Hierdie is ’n fase. Met slim planne kan jy jou man help om dit te navigeer. Dit gebeur nie met almal nie, maar hoef nie ’n slegte ervaring te wees nie.
Ek vermoed jou man beleef eerder ’n krisis as menopouse. Die beste raad wat ek jou kan gee, is om hom te oorreed om sy dokter te besoek. Die dokter sal bloedtoetse doen om te bevestig of jou man gesond is en ’n goeie hormoonbalans het.
Hy moet ook werk maak van die angstigheid wat hy oor sy ouderdom beleef.