huisgenotjies
Stuur gerus oorspronklike grappies; jy kry R50 vir elkeen wat ons gebruik. Skryf aan Huisgenotjies, Posbus 1802, Kaapstad 8000 of grappies@huisgenoot.com en verstrek jou naam, adres, identiteitsnommer en bankbesonderhede (bank, taknaam, takkode en rekeningnommer).
SPOORVEROUDERD
Die wynliefhebber van Johannesburg kla steen en been omdat dit deesdae so lank vat om iets met Transnet te laat verskeep.
Hy het ’n ruk gelede ’n paar kissies Twee Jonge Gezellen van ’n Kaapse kelder bestel. Maar teen die tyd dat dit by sy huis opgedaag het, was dit alles Oude Meester.
L. SAAYMAN
SNAAKSE HAPPIE
Hoekom was die kannibale se mae seer nadat hulle die komediant geëet het? Hulle kon nie ophou lag nie.
SAN MARCHAND
EETGEWOONTES
Ek is op ’n ligte dieet. Ek eet by daglig, by maanlig en soms by yskaslig.
DENISE, PRETORIA
KEN JOU BOKKE
Wat noem ’n mens ’n Springbok wat al die los balle wen? Kwagga! E. MOELICH
BELOONSTELSEL
Klein Jannie se ma vra kwaai: “Hoekom is daar ’n groot, ronde nul op jou toetsvraestel?”
Jannie dink vinnig: “Dit is nie ’n nul nie, Ma. Juffrou het nie meer sterretjies oorgehad nie, toe gee sy my ’n volmaan!”
JOHANNA RADEMEYER
EINDBESTEMMING
Ná ’n groot operasie kom die ongewilde politikus in die hospitaal by en sien die gordyne om sy bed is toegetrek. “Hoekom is die gordyne toegetrek?” vra hy verward. “Is dit dan al nag?”
“Nee,” antwoord die verpleegster, “maar daar is ’n brand in die gebou oorkant die straat.
“Ons wou nie hê jy moes wakker word en dink die operasie het misluk nie.”
LOUISE NOETH
KWAKPRAATJIES
Dokter: “Hoe gaan dit met jou hoofpyn?”
Koos: “Sy kuier by haar ma.” JOHANNA RADEMEYER
VROT VERSEKER
Boer Jan se skuur brand af en sy vrou, San, bel die versekeringsmaatskappy. “Ons het daardie skuur vir R100 000 verseker, stuur asseblief dadelik die geld.”
Agent: “Stadig nou, Mevrou, dit werk nie so nie. Ons stuur eers ’n assessor en as hy tevrede is, gee ons julle ’n ander skuur wat presies dieselfde as die ou een is.”
Onthuts antwoord sy: “As dit is hoe julle werk, moet julle dadelik die lewensversekeringspolis op my man kanselleer!”
WOLLIE, PRETORIA
RIEME STYFTREK
Die sakeman het skatryk geword deur dag en nag te werk, maar nou is sy maatskappy besig om bankrot te speel.
Terneergedruk vertel hy sy vrou hy gaan hul tuiskok moet afdank om geld te spaar, en dat sy voortaan maar self voor die kospotte sal moet staan.
“Goed,” antwoord sy. “Ons kan nog meer geld spaar as jy vir ’n slag meer aandag aan jou vrou gee, want dan kan ons die tuinier ook afdank.”
SAN MARCHAND
KLAGTES
Koos gaan na die hotel se ontvangstoonbank. “Verskoon my, maar ’n kennisgewing daar in my kamer sê ek moet ontvangs kontak as ek enige klagtes het.”
“Dis reg, Meneer,” antwoord die ontvangsdame ewe hulpvaardig. “So, wat is die fout?”
Koos: “Nie veel nie. Net ’n bietjie rumatiek en verder slegte spysvertering.”
SAN MARCHAND