AGTER DIE SKERMS
Huisgenoot het onlangs agter die SKERMS gaan inloer op die stel van die nuwe M-NET-reeks SUMMERTIDE
IE reeks van 52 episodes is in Valsbaai verfilm en sal van einde Januarie te sien wees.
Summertide gaan oor die mariene bioloog Martin Field (Frank Rautenbach), wat ná die dood van sy vrou, Julia (Amalia Uys), saam met sy twee kinders Valsbaai toe trek.
Hier begin hy ’n trust om die omgewing te bewaar, maar niks in die lewe verloop maklik nie.
Frank is besonder opgewonde oor die reeks. “Ek’s in die sewende hemel. Ek hou daarvan om stories te vertel, veral stories oor gesinne. Summertide is die perfekte manier om dit te doen,” sê hy.
Die reeks verken die lewe van die Field-gesin en die interessante karakters wat oor hul pad kom – elkeen met ’n duister agenda.
Ons ontmoet Martin se ma, Wilma (Terry Norton), en pa, Jack (André Jacobs), ’n afgetrede vlootbevelvoerder.
Martin se kinders, Tristan (Jan Combrink) en Lucy (Evangelina Hallock), sukkel nog om tot verhaal te kom ná hul ma se dood.
Dis nou buiten die gewone druk en spanning wat hulle op skool ervaar.
Dan is daar ook Martin se broer, Gavin (Tyrone Keogh), ’n afgetrede beroepsbranderplankryer wat ’n klein branderplankwinkeltjie bedryf en ’n sorgelose lewe lei.
Martin se eks, Rebecca (Monique Rockman), is ook in die prentjie.
Sy het as ’n bekende Michelinstersjef in New York gewerk en gaan nou met Gavin uit.
Die reeks word gemaak deur die televisie-en-fliek-egpaar Corné en René van
Rooyen van Red Letter Day Pictures, wat verantwoordelik is vir die reeks Alles Malan en ook flieks soos Vaselinetjie.
Kykers is verseker van ’n behoorlike drama-ontploffing.
“Ons is ongelooflik opgewonde oor hierdie nuwe reeks en die kreatiewe span wat daarby betrokke is,” sê Waldimar Pelser, M-Net se direkteur van premium kanale.
“Maak jou reg vir ’n onvergeetlike reis saam met ’n outentieke gesin teen die skilderagtige agtergrond van Valsbaai.”