WAT HET VAN SONDAGSTILTE GEWORD?
Ons woon reeds 30 jaar in dieselfde huis in ’ n baie netjiese woongebied met twee skole in die omgewing.
Tye het verander en ’ n mens weet nie eens meer wie jou bure is nie. Almal is agter hoë mure. Ons het so met die tyd vrede gemaak dat daar iewers ’n partytjie aan die gang sal wees op ’n Vrydagaand of straatresies op ’n Saterdagaand. ’n Mens bly maar wakker tot so middernag, en op die ou end daal stilte op die omgewing neer.
Wat my egter ál meer grief, is hierdie nuwe tendens op Sondae. Gras word gesny, kraggereedskap word aangeskakel, en dis so hard, jou tande slyt op mekaar. Karenjins brul soos wat daaraan gewerk word. Boonop basuin radio’s musiek uit wat geen ritme of melodie het nie. Dis ’n doef-doef wat net hoofpyn bring.
Ons wil nie trek nie, want ons het ’n lekker leefhuis. Komplekslewe is nie eens ’n opsie nie. Moet ’n mens maar vrede maak met die toedrag van sake?
Dit is inderdaad ’n groot hartseer om nie Sondagvrede te kan ervaar nie. Jy is reg, tye het verander, gesinsgewoontes het verander, en Sondag het vir baie mense net ’n gewone dag geword.
Die Nasionale Geraasbeheerregulasies is deur die regering ingestel om plaaslike munisipaliteite riglyne te gee oor wat mag en nie mag nie wat geraasvlakke betref. Dit val onder die Omgewingsbewaringswet (Wet 73 van 1989). Munisipale regulasies val onder artikels 4 en 5, en van die dinge wat dit dek, is: ■ Diere se onnodige lawaai; mense se jil en gil in die openbaar.
■ Konstruksiemasjinerie, kraggereedskap en die oprigting van of werk aan konstruksie.
■ Aanhoudende toeters, alarms en megafone se klank.
■ Afbreek van geboue.
■ Gebruik van voertuie met buitengewoon harde klanke.
■ Verkoopspersone se geroep in die strate en aanhoudende lui van deurklokkies.
■ Die speel van radio’s bo ’n sekere desibel.
Dit is maar net ’n paar van die items op die lys. Die wet bepaal dat dié soort geraas beperk moet word vanaf seweuur saans tot seweuur die volgende oggend. Mense het maar net so met die jare in die gewoonte verval om tienuur saans as afsnypunt vir lawaai in ’n buurt te aanvaar.
Jy het opsies. Eerstens kan jy ’n geskrewe klagte by jou munisipaliteit indien. Tweedens kan jy met die hulp van ’n prokureur ’n interdik verkry. Derdens kan jy die polisie bel, veral saans as daar ’n onuithoudbare lawaai is.
Die beste opsie as jy harmonie in die buurt wil behou, is ’n gesprek met jou bure. Julle kan selfs ’n komitee stig wat ook sake soos sekuriteit en netheid op die agenda insluit. Moeilikheid met bure verloop nooit goed nie. Vermy dit so ver jy kan.