CONVICT CONMAN
In 2012 kry die ondersoekende joernalis Sasha Wein ’n wenk om ’n “modelagentskapbaas” – ene Dawie de Villiers – te ondersoek. Nege jaar later, in 2021, kry die joernalis Jana Marx ’n wenk om ondersoek in te stel oor Michael O’Connor wat op die punt is om ’n modetydskrif bekend te stel.
Michael beweer Dawie is ’n “goeie vriend”, maar wat het hulle nog in gemeen?
Convict Conman is ’n nuwe tweedelige Showmax Original-waremisdaadreeks. Dit volg die veroordeelde pedofiel De Villiers wat in 2017 skuldig bevind is op 26 aanklagte van onder meer verkragting, seksuele aanranding, toegang tot kinderpornografie en bedrog. Maar die tronk kon hom nie keer nie.
Die reeks word vervaardig deur IdeaCandy, wat vir Showmax se dokkiereekse Devilsdorp en Rosemary’s Hitlist verantwoordelik was. Die Safta-bekroonde Nikki Comninos maak haar regisseursdebuut.
“Dit was ’n wonderlike ervaring om aan hierdie dokumentêre reeks te werk. Die storie is belangrik, en die mense was so vrygewig om dit te help vertel,” sê Nikki.
“Om in hierdie land te woon wat deur geslagsgebaseerde geweld geteister word, beteken dit is ’n betekenisvolle en noodsaaklike storie.”
’n Klomp interessante en uiteenlopende stemme kan in die reeks gehoor word.
“Daar word gepraat met die polisie en mense wat teen die oortreder opgestaan het. Die reeks betrek ook regsontleders en mediakenners wat help kyk hoe die samelewing toegelaat het dat so iets gebeur.
“Dit is ’n storie wat jou kwaad sal maak, maar ook jou hart sal warm maak en jou laat lag. Dit is ’n wilde verhaal vol kinkels, met regte mense en diep emosies.”