Die herdenking van Shakespeare se Eerste Folio
MEER as 400 jaar nadat sy loopbaan begin het, is die invloed van William Shakespeare se werk nog net so sterk. Maar eintlik kan ons sê dis baie sterker omdat dit vandag wêreldwyd bekend is.
Shakespeare het van 1564 tot 1616 gelewe.
Sy toneelstukke word vandag steeds opgevoer. Baie van hulle is ook al verwerk in flieks en televisiereekse – selfs in animasie.
The Lion King is gegrond op Hamlet, terwyl Gnomeo & Juliet die klassieke verhaal van Romeo en Juliet vat en dit in ’n gemeenskap van tuindwergies laat afspeel.
In November vanjaar herdenk ons die publikasie van Mr. William Shakespeares Comedies, Histories, & Tragedies 400 jaar gelede.
Dit is onder moderne Shakespeare-navorsers as die Eerste Folio bekend en is in 1623 gepubliseer, sewe jaar ná Shakespeare se dood in die dorpie Stratford-uponAvon.
Hoekom is die Eerste Folio so belangrik?
Daar’s ’n wenk in die naam. Die dokument bevat 36 van die dramaturg en digter se toneelstukke en vir die meeste van hulle – 18 om presies te wees – was dit hul eerste verskyning in teksvorm.
Dit sluit werke soos Macbeth, The Taming of the Shrew, Julius Caesar en The Tempest in. Dis die naaste wat ons kan kom aan sy toneelstukke soos wat hy hulle oorspronklik geskryf het. Sy eie handgeskrewe weergawes is al eeue lank verlore.
Daar word gereken 750 kopieë van die Eerste Folio is gedruk. Dis hoeveel eksemplare gewoonlik in daardie dae van enigiets gedruk is vanweë die masjiene wat hulle gebruik het.
Daar is vandag 235 kopieë oor. As deel van die 400-jaar-vieringe het ’n Britse rolprentmaker, Jack Jewers, ’n portret van Shakespeare saam met ’n opname van ’n monoloog uit A Midsummer Night’s Dream met ’n weerballon ruimte toe gestuur. Die vlug is op film vasgelê vir die kortfliek Lovers and Madmen.
“Ek het hierdie beeld in my kop gehad: ’n portret van Shakespeare – die universele dramaturg, wie se werk ek glo tot almal spreek – met die ruimte en die boog van die horison op die agtergrond.
“Wat is ’n meer gepaste manier om die universaliteit (sien Woord
van die Week) van ons menslike ervaring te vier, en hoe dit 400 jaar lank vasgevang is deur hierdie wonderlike skrywer se woorde?” sê Jack.