MY MAN IS VERSLAAF AAN SY REKENAAR
Ek en my man is al 36 jaar gelukkig getroud en het nou albei afgetree. Ek hou van die natuur en buitelewe, maar my man bring nou ure per dag op sy rekenaar deur. Ons het altyd een rekenaar gedeel, maar eendag is die wagwoord sommer net verander. Toe ek daaroor uitvra, het my man woedend gereageer, geblaf ek moet my eie rekenaar koop en by die deur uitgestorm.
Hy het heeltemal verander sedert “uncapped” sy lewe oorgeneem het. Waarom die geheimsinnigheid? Ek voel onrustig en gespanne hieroor.
Vir my is eerlikheid baie belangrik in ons oudag. Ek wil nie vir die gek gehou word nie. Ek mis my man en die band wat ons eens gehad het. Wat moet ek doen? My eie pad begin stap?
Natuurlik mis jy jou man. Egpare sien gewoonlik uit na aftrede, want hulle beplan om baie avonture saam te beleef. Sommige verhuis selfs na hul gunstelingplek en pak reise aan waarvoor hulle nooit tyd gehad het nie.
Nou beleef jy die teenoorgestelde.
Jou man se reaksie op jou vraag sê baie. Hy het moontlik, maar nie noodwendig nie, die een of ander internetverslawing ontwikkel, byvoorbeeld:
■ Aanlyn dobbel
■ Pornografie
■ Geldhandel
■ ’n Affair met iemand anders
■ Aanlyn speletjies
Internetverslawing is nie ’n gewoonte wat maklik afgeleer kan word nie, maar kan as kompulsiewe gedrag geklassifiseer word. Dit beïnvloed verhoudings, jou werk en selfs ’n mens se gesondheid. Dit is soos verslawing aan alkohol, sigarette of seks.
Jou man kry dalk ’n adrenalieninspuiting uit dit waarmee hy besig is en moet dit heeltyd herhaal om daardie euforiese gevoel te bly ervaar.
Dis ook ’n vorm van ontsnapping van hierdie nuwe fase in sy lewe as ’n pensioentrekker. Daar is terapeute wat in die behandeling daarvan spesialiseer en ek sou aanbeveel dat julle daardie roete volg as jy jou man so ver kan kry om in te stem.
Wat jy vir jouself kan doen
■ Moenie aandagsoekend optree nie.
■ Begin met stokperdjies wat jy geniet.
■ Wees sosiaal, nooi vriendinne vir tee en woon gebeure in jul omgewing by.
■ Versorg jouself sodat jy altyd mooi voel; dit sal jou selfvertroue ’n hupstoot gee.
■ Doen oefening, al stap jy net, as teenvoeter vir spanning.
■ Pak klein dekorprojekte in jou huis aan.
Hy moet besef as hy homself in die internet se donker sy begewe (hopelik het hy nie) die gereg dit kan identifiseer en dan het hy groot moeilikheid. Ek hoop van harte jou man stem in vir hulp, dit is moontlik om hierdie ding te oorkom. As jy alles probeer het wat jy kan en niks verander nie, kan net jy besluit of jy wil bly of nie.