Nuwe musiek
Twee plaaslike musieksterre wys op internasionale verhoë wat ons kán doen – en die ganse wêreld luister aandagtig
30 JAAR LATER
Glo dit of nie, dis vanjaar al drie dekades – ja, 30 jaar – sedert die sangeres Corlea Botha (36) op vyf jaar begin sing het.
Sedertdien het die mooiste musiek gevolg: Daar was haar duette saam met Rudi Claase en Jannie Moolman, en onder meer die albums Wie ek is en Onbreekbaar, asook ’n ontelbare rits treffers.
Jy weet dit dalk nie, maar benewens Afrikaans sing Corlea ook in Engels, Frans en Italiaans.
Nou is haar jongste album uitgereik – en die titel, Journey, sê baie, vertel Corlea.
Ja, sy voel asof die laaste 30 jaar ’n reis na haarself was; sy is nou op ’n plek waar sy kan kies wat sy wil sing.
“Dit is ’n ongelooflike voorreg,” sê sy. “Die afgelope 30 jaar was daar baie hoogte- en laagtepunte, maar nou kan ek my liefde vir musiek ook met internasionale gehore deel.”
Corlea verwys onder meer na haar kontrak met die Seabourn Cruise Line-groep.
“Dis ’n maatskappy wat eksklusiewe passasierskepe besit en ek het oor ’n tydperk van ’n paar maande op verskeie van die skepe vertonings gedoen. Ons het plekke soos Antarktika, Kanada en Spanje besoek,” vertel sy.
Die album Journey, wat ook die naam is van die vertoning wat sy vir dié plesierbootgroep gedoen het, is vol bekende treffers, treffers soos “IHaveNothing” “I Have Nothing” van vanWhitWhitney Houston.
“Die persoon wat die besprekings vir al die vermaak op die skepe doen, het ’n opname van die vertoning Classics is Groot as ’n Kersgeskenk ontvang. Hy het my daarop gesien en my genooi om op hul skepe te kom sing.”
Sy het al sewe vastelande gesien terwyl sy op die skepe gesing het.
Die sangeres se verloofde, die sanger JD Mars, het saam met haar gereis. Hulle het die liedjie “We’ve Got Tonight” saam gesing. Dit is oorspronklik deur Kenny Rogers en Sheena Easton gesing.
“Ek dink dit was ’n natuurlike proses vir ons om iets saam te sing,” sê Corlea. “JD se stem het so ’n lekker growwe en lae ondertoon, en myne is hoog en suiwer. Wanneer ons saam sing, is dit iets besonders, en ek voel baie geseënd om my passie vir musiek met my geliefde te deel.”
Baie dinge wag in 2024, soos ’n duet saam met Elvis Blue.
“Elvis is baie talentvol en het die vermoë om iets so eenvoudig te skryf, maar dan dra hy dit met soveel betekenis oor. Toe hy die eerste keer vir my ’n gedeelte speel van die liedjie wat ons saam gaan sing, het ek hoendervleis gekry. Dit gaan ongelooflik wees.”
Sy maak ook gereed om in die vervaardigerstoel in te skuif.
“Ek wil JD onder meer help met sy nuwe enkelsnit, en dan is daar nog so ’n paar ander projekte.”