Nuwe musiek
Twee sangers het onlangs lof ontvang in die bedryf – ons vertel hoekom en gesels met hulle
’N WENNER – JA, SELFS IN PLAKKIES!
Hy staan liefderik as “Plakkies” bekend onder sy aanhangers – ’n naam wat die sanger Chris Steyn (19) gekry het danksy die oopgeknoopte hemde, jeans en plakkies waarmee hy week ná week op die verhoog verskyn het.
Maar ná dese kan jy Chris sommer op sy nuwe titel noem: die wenner van die TV-program Die kontrak.
Chris, sy informele uitrustings ten spyt, het die beoordelaars van die gewilde kompetisiereeks keer op keer met sy sangtalent verras.
Hy is aan die einde van November by Afrikaans Is Groot se openingskonsert as die wenner van die derde seisoen van dié kompetisiereeks aangewys.
Juigkrete het deur die gehoor weergalm toe Chris se naam as die wenner uitgeroep is. Sy mentor in die program, die sangeres Demi Lee Moore, het skoon begin huil. Demi Lee was die wenner van Die kontrak se eerste seisoen.
Aanhangers was verheug toe Chris direk ná die aankondiging sy debuutenkelsnit, “Helemal”, bekendmaak – en dit sommer uitvoer.
“Ek het gesukkel om die trane weg te hou toe ek hoor ek wen,” vertel Chris aan Huisgenoot. “Dit voel onwerklik. My lewe het in die afgelope agt maande onherroeplik verander.”
Chris, ’n student van Stellenbosch, wou aanvanklik nie vir die kompetisiereeks inskryf nie. Sy woonstelmaat het hom egter een aand oorreed om tog maar ’n video van hom op te neem waar hy sing en die kitaar tokkel.
Sy woonstelmaat het die video sonder Chris se wete ingeskryf – en nou is hy nie net die wenner van Die kontrak nie, hy het ook ’n platekontrak ter waarde van R1 miljoen by Coleske Artist Management losgeslaan.
“Ek sien baie uit na my toekoms as sanger, en ek wil graag meer by liedjieskryf betrokke raak,” sê Chris.
En, hoe voel Demi Lee?
Trots, sê sy.
“Ek kon amper nie asemhaal toe ons vir die aankondiging gewag het nie,” vertel sy ons. “Ek het in daardie oomblik terugflitse gehad van die keer toe ek op dieselfde plek as Chris gestaan en wag het om te hoor of my drome waar gaan word.”
En nou hét dit vir Chris gebeur.