DRIELAAGJOGURTTERT met BESSIES

LEWER 1 MIDDELSLAGTERT / BEREIDING: 30 MIN. VERKOEL: 1 UUR 30 MIN. / STOL: 4-6 UUR / OORNAG KORS

200 g vesel- of Tennisbeskuitjies, fyngedruk

100 g botter of margarien, gesmelt 15 ml (1 e) ligbruinsuiker (opsioneel)

LAAG 1

250 ml (1 k) dubbelroom- natuurlike jogurt

30-45 ml (2-3 e) aarbeikonfyt 250 ml (1 k) vars of bevrore bloubessies 10 g gelatien, gespons in 30 ml (2 e) water

LAAG 2

250 ml (1 k) dubbelroom- natuurlike jogurt

45 ml (3 e) aarbeikonfyt

250 ml (1 k) vars of bevrore frambose of aarbeie

10 g gelatien, gespons in 30 ml (2 e) water

LAAG 3

1 x 80 g-sakkie kersiejelliepoeier 125 ml (½ k) kookwater

125 ml (½ k) koue water

AFRONDING

vars bessies

Voer ’n 20 cm- ronde losboomkoekpan met bakpapier uit en bespuit goed met kossproei.

1 Kors Meng die koekiekrummels, botter of margarien en suiker goed. Versprei die mengsel eweredig op die bodem van die pan en druk stewig vas. Verkoel tot nodig.

2 Laag 1 Plaas die jogurt, konfyt en bloubessies in die bak van ’n voedselverwerker en pols tot glad en goed gemeng. 3 Verhit die gelatien 10-15 sek. in die mikrogolfoond of tot net gesmelt. Voeg by die jogurtmengsel en pols tot goed gemeng.

4 Skep die mengsel bo-op die kors, versprei eweredig en verkoel minstens 30 min. in die yskas.

5 Laag 2 Herhaal stap 2 en 3 met die bestanddele vir dié laag. Skep die mengsel versigtig bo-op die eerste laag en versprei liggies. Verkoel minstens 1 uur in die yskas.

6 Laag 3 Los die jelliepoeier in die kookwater op. Voeg die koue water by en meng goed. Giet die jellie bo-op die laaste jogurtlaag en verkoel nog 4-6 uur of oornag in die yskas of tot heeltemal gestol. Die tert kan tot ’n week lank in die yskas gebêre word.

7 Afronding Verwyder die ring versigtig en plaas die tert op ’n opdienbord. Rond af met die bessies soos verkies. Sny in porsies en sit voor.