ROOIBOS-&-AARBEITIRAMISU
GENOEG VIR 6-8 MENSE / BEREIDING: 20 MIN. VERKOEL: 1-2 UUR / OORNAG ROOIBOS
250 ml (1 k) water 4 rooibosteesakkies sap en fyngerasperde skil van 1 lemoen of nartjie (opsioneel)
15 ml (1 e) strooisuiker OF heuning 60 ml (¼ k) brandewyn OF lemoensap
VULSEL
250 g mascarpone 45-60 ml (3-4 e) aarbeikonfyt
5 ml (1 t) vanieljegeursel
250 ml (1 k) room
AFRONDING
200 g vingerbeskuitjies 250-300 g vars aarbeie, skoongemaak en in skyfies gesny vriesdroë aarbeie (opsioneel)
Hou ’n gesmeerde diep glasbak byderhand.
1 Rooibos Plaas die water, teesakkies en lemoen- of nartjieskil, indien gebruik, in ’n kastrol en verhit oor matige hitte tot die mengsel begin prut. Voeg die suiker of heuning by en roer tot opgelos. Laat die mengsel 2-3 min. prut. Verwyder van die hitte, roer die brandewyn of sap by en hou eenkant.
2 Vulsel Klop die mascarpone in ’n diep bak tot glad. Voeg die konfyt en vanielje by en klits tot goed gemeng. 3 Klits die room in ’n ander bak tot sagte punte vorm. Skep ’n derde van die room by die mascarpone en klits tot glad. Vou die res van die room met ’n metaallepel by die mascarponemengsel in.
4 Afronding Haal die teesakkies uit die rooibosmengsel voor jy dit in ’n plat bak giet. Week die helfte van die beskuitjies ’n paar sekondes in die rooibosmengsel – doen dit in sarsies. Pak die geweekte beskuitjies in ’n enkellaag in die gesmeerde glasbak. 5 Pak ’n laag aarbeiskyfies bo-op die beskuitjies, gevolg deur die helfte van die vulsel. Versprei die vulsel liggies en eweredig oor die beskuitjies. 6 Herhaal met ’n laag beskuitjies en aarbeiskyfies. 7 Versprei die res van die vulsel liggies en eweredig bo-op, en bedek die bak met kleefplastiek. Verkoel 2-3 uur of oornag in die yskas. 8 Haal die kleefplastiek af en krummel die droë aarbeie oor, indien verkies, voor jy dit voorsit.