TUISGEMAAKTE PEUSELBESKUITJIES
LEWER ONGEVEER 80-90 BESKUITJIES (AFHANGEND VAN DIE GROOTTE) / BEREIDING: 45 MIN. VERKOEL: 30 MIN. / BAK: 10-12 MIN. PER BAKSEL
Die botterskorsie en sonneblomsaad word in dié peuselhappies versteek vir ekstra voedingswaarde.
250 ml (1 k) sonneblomsaad
250 ml (1 k) koekmeel + ekstra soos nodig
30 ml (2 e) mielieblom
2,5 ml (½ t) bakpoeier
2,5 ml (½ t) sout 100 g koue botter of margarien, in blokkies gesny
125 ml (½ k) gerasperde cheddar of gouda
250 ml (1 k) gaar botterskorsiepuree
15-30 ml (1-2 e) yswater indien nodig
Voorverhit die oond tot 180 °C. Voer ’n paar groot bakplate met bakpapier uit en bespuit met kossproei. Haal solank jou minikoekiedrukkers en seëlbare sakkies of lugdigte bakkies uit en hou dit byderhand.
1 Rooster die sonneblomsaad oor matige hitte in ’n droë pan tot goudbruin en geurig. Roer gereeld om te verseker dat die sade eweredig braai. Skep uit en hou eenkant om heeltemal af te koel.
2 Sif die koekmeel, mielieblom, bakpoeier en sout saam in ’n diep mengbak.
3 Plaas die sonneblomsaad in die bak van ’n voedselverwerker en pols tot fyngemaal. Voeg dit by die meelmengsel en meng goed.
4 Voeg die botter of margarien by en vryf met jou vingerpunte deur die mengsel. Voeg die gerasperde kaas by en werk liggies deur die mengsel.
5 Voeg die botterskorsiepuree by en meng goed tot ’n klewerige deeg vorm. As die deeg nog te droog is, voeg ’n klein bietjie yswater by.
6 Besprinkel jou werkoppervlak liggies met meel. Keer die deeg daarop uit en druk die deeg saam tot ’n bal vorm. Verdeel die deeg in 2 gelyke dele en bedek met kleefplastiek. Verkoel 30 min. in die yskas.
7 Besprinkel weer die werkoppervlak met meel en rol een van die stukke deeg ongeveer 2 mm dik daarop uit. Druk vormpies uit die deeg en pak dit in ’n enkellaag op die bakplate.
8 Herhaal met die orige stuk deeg. Druk die oorblywende deegstukkies saam, rol uit en druk nog vormpies uit.
9 Bak die beskuitjies 10-12 min. of tot bros en ligbruin om die kante. Laat heeltemal afkoel.
10 Verdeel die beskuitjies in porsies, pak in die sakkies of bakkies, en bêre tot ’n week lank in ’n koel, donker plek.
WENK
BÊRE-WENK Vries die helfte van die deeg tot ’n maand lank. Laat dit teen kamertemperatuur ontdooi en volg die resepstappe.