FRANSE ROOSTERBROOD met HAWERMOUTKRUMMEL
GENOEG VIR 4 MENSE / BEREIDING: 30 MIN. GAARMAAK: 15-20 MIN.
Ons krummel hawermout oor die een kant van die roosterbrood vir ekstra woema vir die skooldag.
½ ongesnyde brood 4 eiers, geklits 250 ml (1 k) melk ’n knippie sout 250 ml (1 k) hawermout
60 ml (¼ k) ligbruinsuiker
5 ml (1 t) fyn kaneel ’n bietjie olyfolie vir braai
VIR VOORSIT
aarbeie, in skyfies gesny (opsioneel) heuning (opsioneel)
Gebruik ’n groot kleefvrye pan.
1 Sny die brood in lekker dik skywe. (Jy kan klaargesnyde brood ook gebruik indien verkies.) Sny elke skyf in die lengte in die helfte, of soos verkies. (Jy kan die broodskywe ook eers nadat dit gebraai is, sny.)
2 Klits die eiers, melk en sout goed saam en giet in ’n plat bakkie. Skep die hawermout in ’n ander plat bakkie.
3 Meng die suiker en kaneel en hou eenkant.
4 Dompel een van die broodstukke in die eiermengsel, laat week 2-3 sekondes, draai om en haal versigtig uit. Pak die broodskyf bo-op die hawermout – die hawermout sal aan die een kant van die brood vaskleef – as dit sukkel om te kleef, druk ’n bietjie van die hawermout met jou vingers vas.
5 Herhaal met die res van die broodskywe – net die hoeveelheid wat in die pan sal pas.
6 Verhit ’n bietjie olie oor matige hitte in die pan. Pak die broodskywe, met die hawermoutkrummels na onder, in ’n enkellaag in die pan. Braai ’n minuut of tot die hawermout goudbruin is.
7 Draai die broodskywe versigtig om, en braai tot goudbruin en deurgaar. Herhaal met die res van die brood.
8 Vir voorsit Sprinkel ’n bietjie van die kaneelsuiker oor die warm roosterbrood en rond af met aarbeiskyfies en heuning of soos verkies.