huisgenotjies
Stuur gerus oorspronklike grappies; jy kry R50 vir elkeen wat ons gebruik. Stuur dit na Huisgenotjies, Posbus 1802, Kaapstad 8000 of grappies@huisgenoot.com en verstrek jou naam, adres, identiteitsnommer en bankbesonderhede (bank, taknaam, takkode en rekeningnommer).
UITTOG
Vir die meeste kantoorwerkers begin die spitsverkeer vyf dae per week so 05:00 soggens tot 10:00. Smiddae begin dit weer so 15:00 en is 19:00 verby.
Staatsamptenare is egter die uitsondering ... Hul Vrydagmiddag spitsverkeer begin al Donderdagoggend. LOUISE NOETH
WARE LIEFDE
Die ou oompie vra sy vrou: “Het jy al vandag jou tande geborsel?
Die tante antwoord: “Ja, en aangesien ek reeds besig was, het ek sommer joune ook geborsel.” SAN MARCHAND
GROOT VIS
Jasper hardloop in die viswinkel in. “Maak asseblief gou!” sê hy vir die man agter die toonbank. “Ek moet die bus vang en het aas nodig!”
Die winkelassistent krap sy kop en sê: “Gits, Meneer, ek glo nie ons het enige aas wat ’n bus kan vang nie!” SAN MARCHAND
WARM VRYER
Dis ’n gekoer op die strand.
Sy: “Liefie, wanneer jy jou arms so om my nek sit, stuur dit sulke koue rillings teen my ruggraat af,” fluister sy.
Hy: “O gonna . . . Dis nie koue rillings nie, my skat; my roomys is besig om te smelt!”
JOHAN H, GONUBIE
DIAGNOSE
Hettie se kar maak vreemde geluide, maar sy is keelvol vir die manne by die motorherstelplek wat optree asof vroue dom is. Sy vra toe eers ’n vriend se mening oor wat als fout is en neem dit daarna in.
Daar gekom, rits sy die probleme af: “Die tydinstelling is uit. En daar’s ’n probleem met vroeë ontbranding, en ek is bang dit beskadig die kleppe.”
Ewe tevrede loer sy oor die werktuigkundige se skouer om te sien wat hy neerskryf en lees: “Die klant sê die kar maak snaakse geluide.”
LOUISE NOETH
VLUGTIG
Onderwyser: “Koos, maak vir my ’n sin met ‘ongeveer’.”
Koos: “Die voël kry seker koud, want hy is ongeveer.” SAN MARCHAND
AANWAS
Die nuwe intrekkers langs ons het vreeslik baie kinders. Nou die dag gooi ’n poetsbakker ’n klip op hul dak en toe lyk dit kompleet asof die laerskool uitkom!
EMMIE, MOSSELBAAI
DOL DEFINISIES
Vleisbraai: ’n Partytjie waar die kos ’n bietjie rou en die gaste ’n bietjie gaar is.
Babawaentjie: Verlede jaar se pret op wiele.
Dieet: ’n Manier van maer word waarvoor jy gou dik word.
Gesinsvakansie: Wanneer jy alles saamneem waarvan jy eintlik wil wegkom.
Gewete: Iets wat pla as alles baie lekker gaan.
Middeljare: Wanneer jy jou emosies vir simptome verruil.
Predikant: Ses dae is hy onsigbaar en die sewende dag is hy onverstaanbaar. LOUISE NOETH
POKERGESIG
Koos stap in die kroeg in en sien tot sy verbasing hoe ’n hond saam met ’n groepie by ’n tafel sit en poker speel. “Speel hy goed?” wil hy van die kroegman weet.
“Nee, nie regtig nie,” antwoord die kroegman. “Elke keer as hy ’n goeie hand het, waai hy sy stert!” LOUISE NOETH