PHIL STUTZ SE LESSE VIR DIE LEWE
Materiële goed sal jou nooit gelukkig maak nie
Mense kan nooit deur die materiële wêreld gelukkig gemaak word nie. Ons is spirituele wesens en kan net emosioneel gesond wees wanneer ons met ’n hoër wêreld in aanraking is. Dit is nie abstrakte filosofie nie. Dis ’n beskrywing van ons aard. Maar dit verg voortdurende werk om met hierdie magte in aanraking te bly. En tog is dit ook in ons aard om hierdie werk te probeer vermy.
Hoe om woede te hanteer
Woede is onvermydelik, maar dis belangrik dat dit reg verwerk word op die oomblik wanneer dit opduik. Dit behels drie stappe:
Wanneer jy kwaad is, wees ’n oomblik stil en fokus op jou woede. Blok alles anders uit.
Die tweede stap is om die woede heeltemal af te sluit. Visualiseer jouself in ’n natuuromgewing in die nag terwyl jy na die sterre opkyk. Laat jouself onbenullig in die heelal voel. Jou persoonlike bekommernisse sal onbelangrik lyk en jy kan jou woede voel verdwyn.
Laastens, fokus op die mens wat jou woede ontlok het en stuur vir hulle ’n liefdevolle energie. Moenie met jouself baklei oor of die mens die liefde regtig verdien of nie. Uit hierdie nuwe gesigspunt sal jy die frustrasies van die lewe kan aanvaar sonder om gespanne te raak.
Let op jou ontevredenheid
Ons kultuur word gekenmerk deur die voortdurende strewe na iets beters. Ons beskou dit as ons godgegewe reg om die groter huis na te jaag, die vinniger kar, die werk wat ons aansien verhoog. Ons soek buite onsself na iets meer. Die gevolg is ’n dolheid van aktiwiteit, aangespoor deur die vrees om op iets uit te mis. Dit maak ons emosioneel moeg en laat ons spiritueel uitgeput.
Nêrens is hierdie strewe afbrekender as in ons intieme verhoudings nie. Om ’n beter kar te wil hê is een ding. Om ’n beter vrou of man te wil hê is iets heel anders. Ons het ’n hebsugtige, veroordelende mag ingebring by ’n plek waar dit nie hoort nie – die ryk van die liefde.
Dis in die menslike aard om oor ander maats te fantaseer. Ons sê vir onsself dis gratis en skadelose genot, en dikwels is dit. Maar verby ’n sekere punt word fantasieë ’n struikelblok vir ’n verhouding. Jy sal weet jou fantasieë is buite beheer wanneer dit lank en verwikkeld is, as jy dit as ’n teenvoeter vir ontevredenheid met jou maat gebruik, of as dit glad geen verband met die werklikheid het nie. Hoe meer energie jy in jou magiese kamma-maat en fantasielewe stort, hoe minder energie sal jy vir jou regte maat en jou regte lewe hê.
Wees nederig
Die ego hou van groot, dramatiese dade wat lyk asof dit die toekoms wonderbaarlik sal verander. Dit gee die ego ’n gevoel van mag. Werklike dissipline is die totaal teenoorgestelde. Dit bestaan uit ’n eindelose aantal klein treë wat elkeen op sy eie betekenisloos kan lyk. Die ego moet homself nederig maak om op ’n produktiewe pad te bly voortgaan.
’N UITTREKSEL UIT LESSONS FOR LIVING: WHAT ONLY ADVERSITY CAN TEACH YOU DEUR PHIL STUTZ, UITGEGEE DEUR VERMILION, BY