OOSTERSE HEEL HOENDER

GENOEG VIR 4-5 MENSE / BEREIDING: 20 MIN. / GAARMAAK: SOWAT 1 UUR

Pynappel ingemeng by die marinade van lemmetjies, koljanderblare, gemmerwortel en knoffel saam met ’n bietjie anyssaad verskaf nie net ’n heerlike ekstra soet-suur smaak daaraan nie; die ensiem bromelien dien ook as versagmiddel om die hoender heerlik sag en sappig te maak.

MARINADE

10 ml (2 t) anyssaad

3 knoffelhuisies, fyngerasper

3 cm-stuk gemmerwortel, fyngerasper

sout

’n halwe pynappel, afgeskil en fyngekap

45 ml (3 e) sojasous

1 bos koljanderblare met wortels, goed afgespoel en fyngekap

30 ml (2 e) strooisuiker 2 rooi brandrissies, pitjies verwyder en fyngekap sap en fyngerasperde skil van 1 lemoen sap en fyngerasperde skil van 2 lemmetjies

60 ml (¼ k) olie

HOENDER

1 heel hoender

3-4 rooi-uie, in wiggies gesny

VIR VOORSIT

’n halwe pynappel, geskil en in blokkies gesny

1 rooi brandrissie, ontpit en gekap

2 saadlose minikomkommers, in skyfies gesny

’n hand vol gekapte koljanderblare

’n spatsel rysasyn

Voorverhit die oond tot 230 °C. Smeer ’n oondbak met ’n bietjie olie.

1 Marinade Druk die anyssaad saam met die knoffel en gemmer en ’n klein bietjie sout in ’n vysel en stamper fyn. Meng met die res van die marinadebestanddele.

2 Hoender Lig die vel oor die bors en druk van die marinade onder die vel in. Maak ook ’n paar kepe oor die dytjies.

3 Pak die uie in die oondbak en plaas die hoender bo-op. Giet die res van die marinade oor.

4 Oondbraai 15 min., verlaag die temperatuur tot 180 °C en oondbraai nog 30-45 min. of tot die hoender goudbruin en gaar is.

5 Haal die hoender uit en kook die pansappe en uie op die stoofplaat tot sag en effens gekaramelliseer. Skep in ’n opdienbord en plaas die hoender bo-op.

6 Vir voorsit Meng die pynappel, brandrissie, komkommers, koljanderblare en spatsel asyn en sit voor saam met die hoender.