ONDERSTEBO PYNAPPELKLAPPERKOEK

BEREIDING: 15 MIN. / BAK: SOWAT 50 MIN.

Die koek kry nie net skyfies pynappel onderin nie; dit kry ook ’n lagie in die middel. Die klappermelk en -olie maak dit heerlik anders, maar ook geskik vir mense wat laktose-intolerant is. Deesdae kry ’n mens versoeter-en-suikermengsels wat ideaal is om mee te bak en geen nasmaak het nie en die suikerinhoud van jou gebak halveer.

KOEK

1 vars pynappel, geskil en in dun skyfies gesny

500 ml (2 k) koekmeel

12,5 ml (2½ t) bakpoeier

’n knippie sout

90 ml (6 e) klapperolie

250 ml (1 k) suikeren-versoetermengsel of andersins strooisuiker

250 ml (1 k) klappermelk

2 eiers

5 ml (1 t) vanieljegeursel

VERSIERSEL

250 ml (1 k) versiersuiker, gesif

7,5 ml (1½ t) klapperolie

sowat 10 ml (2 t) klappermelk of water

AFRONDING

2-3 pynappelskyfies, met skil en al

droë repies klapper

pynappelblaartjies

versiersuiker vir oorstuif

Voorverhit die oond tot 180 °C. Bespuit ’n 20 cm-losboompan met kossproei en voer die bodem met bakpapier uit. Bespuit weer goed. 1 Koek Rangskik die pynappelskyfies op die bodem van die uitgevoerde pan. Kap die res van die pynappel op.

2 Sif die koekmeel, bakpoeier en sout saam.

3 Klits die klapperolie, suiker-en-versoetermengsel of strooisuiker, klappermelk en eiers saam tot gemeng.

4 Vou die droë bestanddele hierby in; moenie te veel meng nie. Skep die helfte van die beslag in die uitgevoerde pan, sprinkel die gekapte pynappel bo-oor en skep die res van die beslag oor.

5 Bak sowat 50-60 min. of tot ’n toetspen skoon maar steeds effens klam uitkom. Laat in die pan afkoel en keer dan om op ’n opdienbord met die pynappellaag na bo. Verwyder die bakpapier.

6 Versiersel Sif die versiersuiker weer en klits saam met die klapperolie tot lig en donsig en smeerbaar. Voeg ’n bietjie klappermelk of water by as dit te styf is. Drup die versiersel oor die koek.

7 Afronding Pak die pynappelskyfies op ’n bakplaat en oondrooster by 200 °C tot die skyfies verdonker om die buitekante en effens droog is.

8 Sprinkel die droë repies klapper oor die koek en versier met die geroosterde pynappelskywe en blaartjies. Stuif die versiersuiker oor.