STUDIEGEWOONTES OM NA TE VOLG
’n Vaste, daaglikse studieroetine lê ’n bestendige grondslag wat kinders na hul volwasse lewe kan deurdra.
Goeie gewoontes help ons om belangrike dinge te doen sonder om daaroor te dink, wat uitmuntendheid ‘n deel van jou daaglikse lewe maak. Bepaal ‘n spesifieke tyd waarop jou kinders elke dag huiswerk doen en studeer om hulle in die gewoonte te kry om dit elke dag te doen – dit sal nie net op skool tot hul voordeel wees nie, maar ook daarna. Wanneer hulle dit onder die knie het, is hier vyf maniere om hul leervermoë te verbeter.
SKEP ‘N RUIMTE
1 Skep ‘n stil en ordelike werkplek. Maak seker die studiegebied is goed belig en toegerus met noodsaaklike voorrad soos penne, potlode, notaboeke en naslaanwerke. Maak ook seker dis ver van afleidings soos die TV, radio of rekenaarspeletjies.
LEER HULLE OM TE PRIORITISEER
2 Die skool kan maklik oorweldigend raak. Leer jou kinders hoe om hul take volgens dringendheid te organiseer, hoe lank dit duur om dit af te handel en hoe moeilik dit is. Moedig hulle aan om werkopdragte in kleiner, makliker hanteerbare take op te deel. Dit dra by tot die doeltreffende afhandeling van werkopdragte en gee ‘n gevoel van prestasie en selfvertroue. Gebruik ‘n beplanner om die week of maand vooruit te beplan.
GEBRUIK KLEUR
3 Kinders onthou beter wanneer hulle skeppend is tydens studietyd. Wanner hulle byvoorbeeld geskiedenis leer, kan hulle vir elke era ‘n ander kleur gebruik en die belangrike feite in die eras met aksentstiffies uitlig. Of wanneer hulle werk opsom, soos biologie of wetenskap, kan hulle verskillende temas in verskillend kleure verdeel.
NEEM POUSES
4 Wanneer jy moeg voel, is dit goed om op te staan en deur die huis te loop, ‘n glas water te drink, of met ‘n troeteldier te speel, want dit gee jou brein tyd om alles wat dit geleer het, te verwerk. Ligte oefening en water in dié tyd verbeter sirkulasie en help jou brein fokus.
VRA VRAE
5 Leer jou kinders dis oukei om hulp te vra wanneer hulle probleme in hul studie kry. Of dit ‘n wiskundeprobleem is wat groot uitdagings stel, of ‘n onbekende verskynsel in ‘n boek, moedig hulle aan om vrae te vra.