IS PORNOGRAFIE NORMAAL?
Skryf gerus vir my oor jou sake van die hart of moeilike persoonlike kwessies. Ek beantwoord hier vrae en briewe van lesers en gee graag raad. Ek sal nie jou naam bekendmaak nie, en jou identiteit bly vertroulik. Skryf vir my by: Vra vir Irma, Posbus 1802, Kaapstad 8000 of stuur ’n e-pos na vra
virirma@gmail.com of SMS Vra vir Irma gevolg deur jou vraag na 36489.
V Ek en my man is al 18 jaar getroud, en ek het gedink alles loop klopdisselboom. Tot my skok het ek onlangs uitgevind my man kyk al vir jare pornografie en bevredig homself dan. Hy beweer dit gebeur net een keer per week. Ek beskou dit as egbreuk, maar hy sien niks verkeerd daarmee nie. Is dit normaal vir mans?
A Die gebruik van pornografie is die afgelope jare sterk aan die toeneem, onder mans sowel as vroue. Dit is ’n wêreldwye neiging. Dit kan verslawend wees, nes alkohol, dwelms en dobbel.
Verslaafdes gebruik dit as ’n teenvoeter vir stres of plaasvervanger vir emosionele vertroeteling.
Omdat dit ’n kompulsiewe gedragsverslawing kan word, vind verslaafdes dit moeilik om dit te oorwin. Dit is behandelbaar by ’n terapeut of sielkundige wat daarin spesialiseer. Dit vat net tyd.
■ Vertrouensbreuk, omdat dit geheimsinnig plaasvind.
■ Dit skep onrealistiese verwagtings in die bed.
■ Dit blok emosionele intimiteit.
■ Dit maak ’n mens minder tevrede met wat in die huweliksbed gebeur.
■ Emosionele intimiteit neem skerp af tussen die paartjie.
■ Dit laat die maat voel hulle is nie goed genoeg nie.
Wat kan jy doen? Eerstens moet jy aanvaar dat jou man dalk fantasieseks verkies. Aanvaar ook dat jou man dit dalk nie net een keer per week doen nie.
Moenie stilbly oor die uitwerking wat dit op jou het nie. Jy sal dapper moet optree en jou man presies vertel hoe jy voel. Jy moet reëls neerlê oor gedrag wat vir jou onaanvaarbaar is, veral in jul slaapkamer. Moedig hom ook aan om hulp te kry as dit ’n verslawing is.
Suid-Afrika het spesifieke wetgewing in plek wat verband hou met pornografie. Geen akteurs of rolspelers onder 18 jaar mag in pornografiese materiaal verskyn nie. Geen diere mag betrokke wees nie. En geen geweld mag gepleeg word met die vervaardiging van die inhoud nie. ’n Mens oortree dus die wet as jy sulke pornografie kyk.