ONS DOGTER SE GEDRAG ONTAARD IN ’N NAGMERRIE
Ons het een dogter wat sopas matriek geskryf het en ook twee seuns in die laerskool. Ek is ’n tuisteskepper en my man het ’n goeie werk. Geen probleme of tienergeite is ooit van haar kant af ontvang nie. Ons was ook nog nooit bekommerd oor haar toekoms nie, want sy het altyd laat blyk dat sy saam met haar groep maats gaan studeer en later voltyds gaan werk. Kort voor Kersfees het ons dogter haar bas op die bank voor die televisie geplak, en dis waar sy nou nog is. Toe ons haar vra wat fout is, het sy met ’n stem vol bravade aangekondig sy wag vir ’n ryk man om mee te trou. Ons het eers gelag, want dit is ’ n absurde uitlating. Soos die tyd verloop, roer sy steeds nie, en met ’n opvolggesprek was haar redenasie dat sy nie insien hoekom sy moet swoeg vir geleerdheid en later verder swoeg by ’n werkplek as sy net eendag gaan trou en kinders grootmaak nie. Sy reken iemand met geld sal dit ten minste die moeite werd maak. Nie eens haar geliefde ouma het tans ’n invloed op hierdie sottigheid nie en ons sit met ons hande in die hare. Help, asseblief.
Dit is beslis ’n tameletjie waarmee julle sit. Kom ons probeer perspektief kry deur na die groter prentjie te kyk.
In die eerste plek is jou dogter reg dat miljoene vroue met geleerdheid kinders grootmaak en huishou. Jou dogter moet net herinner word dat dit in haar geval altyd ’n keuse sal wees. Sy hoef nie ’n tuisblyma te wees as sy eerder ’n beroep wil beoefen nie. Sy hoef nie eens kinders te beplan as sy nie wil nie.
Deur net heeldag op die bank te sit gaan sy ook nie ’n ryk man na die voordeur lok nie. Hulle moet ten minste van haar bewus wees. Wat is sy van plan om te doen om dit te bewerkstellig? Daar is baie gevaarlike webtuistes waar jong vroue inteken en in groot moeilikheid beland. Mans wat jong vroue teiken, is nie jou speelmaat nie, al kom hulle hoe sjarmant voor.
Wat julle dadelik kan doen, is om ’n kontrak tussen julle en haar op te stel. Daarin is die bepalings vir huurgeld, etes, wasgoed, klereaankope en kamernetheid saamgevat. Wees ferm daarmee, dit laat haar dalk anders dink oor die feit dat sy net so wil bly sit.
Onthou tieners gaan gewoonlik uit en hou van sosiale aktiwiteite en bly soms tot laat uit. Die feit dat jul dogter dit nie eens saam haar met maats doen nie, laat my wonder of sy nie dalk onderliggende depressie het nie. Neem haar eers na jul huisdokter toe, wat sy sal vertrou. Dis vir gemoedsrus.