THE BEEKEEPER
Aksieriller. Met Jason Statham, Emmy Raver-Lampman en Jeremy Irons. Regie: David Ayer. 16.
Nou in fliekteaters.
Die Transporter- ster Jason Statham is terug in ’n nuwe aksiebelaaide rol as Adam Clay, ’n man met ’n missie. Die fliek is die geesteskind van die Suicide Squadregisseur David Ayer en die draaiboekskrywer Kurt Wimmer, wat ook Expend4bles geskryf het.
Nadat sy vriendin en buurvrou, Eloise Parker (gespeel deur Phylicia Rashad), haar eie lewe geneem het as gevolg van ’n bedrogspul, besluit Adam om wraak te neem op die maatskappy agter die slenter.
Daar word dan onthul dat Adam eintlik deel is van ’n magtige organisasie, die Beekeepers.
Hoewel Adam hom besig hou met ’n werklike byeboerdery, verteenwoordig die Beekeepers iets heel anders as heuning produsente. Die organisasie is toegewyd daaraan om die wêreld te beveilig teen verskeie dreigemente en korrupsie. Die lede van die organisasie staan bekend as die “bee hive”. Saam met Jason is die Umbrella Academy- ster Emmy Raver-Lampman te sien as die FBI-agent Verona Parker, Eloise se dogter. Die legendariese Jeremy Irons vertolk die rol van die skurk Wallace Westwyld. Die karakter word beskryf as ’n soort George H.W. Bush-figuur, sou dié voormalige president Brits gewees het. Wallace is egter in diens van die eintlike antagonis van die fliek, Derek Danforth, gespeel deur Josh Hutcherson.
“The Beekeeper verken universele temas deur ’n onkonvensionele storie wat kykers op die punt van hulle stoel gaan hou,” sê Bill Block, die hoof van die produksiehuis Miramax. Die fliek is deurtrek van bymetafore en word veral vergelyk met die John Wick- reeks. ❑