HOE HANTEER EK MY KIND SE WEGGAAN?
My hart is so seer vandag. Ons het my seun die naweek universiteit toe geneem en dit was vreeslik om vandag terug te keer na ons huis sonder hom. Ek het baie hard probeer om dapper te wees, maar toe die wiele by die kampus se hek uitrol, toe is ek ’n reënstorm. Al het ek geweet die tyd kom eendag, en al het ons gesorg vir ’n goeie opvoeding vir ons kind, is ek steeds heeltemal onkant betrap deur my reaksie. My man is ook maar stil. Gewoonlik sal hy heelwat te sê hê oor ’n emosionele uitbarsting. Is dit normaal om so te voel? Gebeur dit met ander ouers ook?
Kom ek stel jou sommer dadelik gerus: Duisende ouers gaan deur presies dieselfde emosies hierdie tyd van die jaar. Jy en jou man is dus nie alleen nie.
Onthou, 18 jaar lank was jou kind om jou en in jou lewe op ’n intieme ouer-kind-vlak, en daarom is ’n baie sterk band tussen julle gevorm.
Dit is juis hierdie band wat sal sorg dat julle mekaar nog sal koester ten spyte van die afstand tussen julle.
Natuurlik is ’n mens baie opgewonde omdat jou kind die kans kry om die studentelewe te geniet, en terselfdertyd te bou aan ’n loopbaan.
Maar dis ook ’n aanpassing om hom nie meer om jou voete te hê nie.
Ek wil graag die volgende aan jou noem wat kan verander:
OMSTANDIGHEDE VERANDER
Geen mens kan bestaan sonder dat daar die een of ander tyd verandering in jou lewe plaasvind nie. Dit hoef glad nie ’n emosionele krisis te wees omdat jou kind semipermanent uit die huis is nie. Jy kan jou in die begin so ’n bietjie pamperlang met skoonheidsessies, tee saam met vriendinne of ’n nuwe stokperdjie. Moenie fokus op jou seun wat afwesig is nie.
VERANDERING IN JUL VERHOUDING
Dis baie belangrik om in ag te neem dat die verhouding tussen jou en jou kind geleidelik gaan begin verander, want hy gaan begin verander. Hy gaan nuwe en ander lewenservarings opdoen wat sy perspektief oor sekere aspekte gaan verskuif.
Hy gaan dalk anders begin dink oor sekere goed en sy manier van doen daarvolgens aanpas. Hy gaan homself begin handhaaf as ’n jong man sonder julle. Selfs die trant van jul gesprekke kan dalk verander soos wat hy sy plek in die wêreld begin verstaan en vul.
VERANDERING IN OUERS SE VERHOUDING
Soos wat elke kind die huis begin verlaat, gaan die dinamika tussen jou en jou man ook verander. Julle gaan weer as ’n paartjie alleen saam leef. Dit is egter ’n gesprek heel op sy eie.
Vir nou raai ek aan dat jy saam met jou kind bly is dat hy die studentelewe kan ervaar. Jy sal wel deur hierdie nuwe fase kom. Sterkte.