HOEKOM IS EK SKIELIK VIR ALLES BANG?
My probleem klink dalk simpel en onlogies, maar ek moet iets daaromtrent doen. Sien, ek woon nou al vyf jaar alleen. Dit was nog nooit vir my ’n probleem nie. Ek het nog altyd ’n goeie alarmstelsel gehad, en het ook twee honde wat buite en binne saam met my leef.
Die afgelope jaar het dinge drasties verander by my. Ek het skielik bang geword vir alles. Ek het ligte laat aanbring om die huis, heinings aangepas, die alarmstelsel opgradeer en selfs ekstra kameras oral laat aanbring.
Ek slaap sleg, want die geringste geluid laat my dink iemand betree my eiendom. Ek bestee onnodig baie tyd om na die kameras se beeld op my foon te staar. Ek woon in ’n rustige, goeie woonbuurt, maar ek is die hele tyd baie angstig.
Ek werk van die huis af en gaan net een keer per week winkels toe vir aankope. Wanneer ek terugkeer, is ek ’n senuweewrak en ek slaan in sweet uit net aan die gedagte dat iemand dalk in my huis is.
Waarom is ek so? Ek het nie ’n traumatiese ervaring gehad nie. Kan jy my asseblief help?
Laat ek jou dadelik gerusstel: Vrese op enige vlak is nooit simpel of onlogies nie. Dit verg aandag sodat ons kan bepaal waar dit vandaan kom en wat daaromtrent gedoen kan word.
Daar is die moontlikheid dat jy aan ’n algemene angssteuring ly, soos miljoene ander mense wêreldwyd. Gewoonlik gebeur dit ná ’n traumatiese ervaring; jy noem egter dat jy geen negatiewe voorvalle gehad het nie.
Die ander oorsaak kan natuurlik wees as ’n mens hoë vlakke van spanning beleef. Dit lei dikwels tot ’n gevoel van gevaar, al is daar nie gevaar nie. Die gevolg is dat ’n mens paniekerig begin raak, want jy voel hulpeloos. Van die simptome met so ’n angsaanval kan wees:
■ ’n vinnige hartklop
■ die gevoel dat jy wil flou word
■ kortasem
■ ’n naar of siek gevoel
■ bewerigheid en oormatige sweet
■ ’n tinteling in die vingers en lippe
■ die gevoel dat jy geen beheer het nie.
Ek wil graag aan jou noem dat baie mense hulle tot alkohol, dwelms of dobbel wend as ’n vorm van selfmedikasie vir hul angs. Dit maak eintlik die probleem net erger.
Ek raai jou ten sterkste aan om ’n professionele persoon te gaan spreek wat jou kan help met jou angs. Jy sal hanteringsmeganismes leer wat jy kan toepas wanneer jy so vreesbevange raak, soos byvoorbeeld kalmerende asemhalingstegnieke.
Jou honde is beslis ’n aanwins, en ek is seker hulle sal alarm maak as iets vreemds buite beweeg. Dit sal dalk ook goed wees as hulle by jou in jou kamer slaap snags.
Skep moed, jou angstigheid is beslis oorkombaar.