DHALTJIESAMPIOENKOEKIES
LEWER 12-14 KOEKIES, AFHANGENDE VAN DIE GROOTTE BEREIDING: 20 MIN. / GAARMAAK: 30 MIN.
Dis die ideale plan vir oorskiet-sampioene. Vir hierdie koekies maak ons ’n groentemengsel soortgelyk aan dhaltjies. Dié koekies kan voorgesit word as ’n bykos of happiekos, of dit kan selfs gebruik word pleks van maalvleispatties op burgers.
30 ml (2 e) olyfolie 1 ui, in skyfies gesny 15 ml (1 e) botter 250 g gemengde sampioene, grofgekap
200 g baba- of gewone spinasie, gekap
’n hand vol vars koljanderblare, gekap 2-4 groen brandrissies, gekap 375 ml (1½ k) koolslaaimengsel 2 eiers, geklits 500 ml (2 k) bruismeel
15 ml (1 e) geroosterde masala 5-10 ml (1-2 t) geroosterde komynsaad
5 ml (1 t) sout water, soos nodig
DOOPSOUS
250 ml (1 k) natuurlike volroomjogurt 15 ml (1 e) suurlemoensap ’n knippie elk fyn komyn en fyn koljander
15 ml (1 e) gekapte vars ment of 2,5 ml (½ t) gedroog sout, na smaak
AFRONDING
’n bietjie olie vir braai babaspinasie of vars kruie (opsioneel)
1 Verhit die helfte van die olie in ’n groot pan en braai die ui tot goudbruin en gaar. Skep uit en hou eenkant.
2 Verhit die res van die olie, asook die botter, in die pan en braai die sampioene tot gaar. Skep by die uie, en skep in ’n diep mengbak.
3 Voeg die spinasie, koljander, rissies en koolslaai by en meng liggies. Meng die eier deur.
4 Meng die bruismeel, masala, komyn en sout in ’n ander bakkie goed. Voeg die meelmengsel by die groentemengsel. Meng goed en voeg water by, soos nodig, tot ’n nat mengsel vorm.
5 Doopsous Meng alles goed.
6 Afronding Verhit ’n bietjie olie in ’n groot pan en skep hopies van die mengsel in die pan. Druk die hopies plat sodat dit soos groentepatties lyk. 7 Braai tot bros aan die een kant, draai versigtig om en braai tot die koekies gestol en gaar is. Skep uit en herhaal met die res van die groentemengsel. 8 Sit voor saam met die doopsous en vars kruie, indien verkies.