SOPIES SE SKADE

Al is jy nie ’n alkoholis nie, kan drank ’n negatiewe uitwerking op jou gesondheid en voorkoms hê

JOU GESONDHEID

BREIN Te veel alkohol kan lei tot vergeetagtigheid, verwardheid en ’n gebrek aan koördinasie. Apatie, disoriëntasie en geheueverlies kan ook voorkom. Die brein kan ook krimp.

HART Te veel alkohol verhoog die vlakke van sekere vette in die bloed, wat kan lei tot hoë cholesterol en hartsiektes.

LEWER ’n Gesonde lewer breek alkohol af, maar as die lewer te hard moet werk, kan dit permanente skade ly en ondoeltreffend raak.

PANKREAS Alkoholmisbruik kan lei tot pankreatitis. Dit veroorsaak kwaai brandpyn in die boonste deel van die buik, naarheid en vomering wat vererger word wanneer jy eet.

GEWIGTOENAME ’n Blikkie bier (340 ml) bevat tot 570 kJ, en 120 ml droë wyn kan tussen 350 en 500 kJ bevat. Dit beteken so ’n glas is gelyk aan twee snye witbrood.

VRUGBAARHEID Vroue kan sukkel om swanger te raak en mans se spermtelling kan verlaag.

KANKER Jou risiko vir onder meer bors-, kolon-, long-, nier- en lewerkanker verhoog namate die hoeveelheid alkohol wat jy drink, vermeerder en hoe langer jy gereeld drink.

JOU VOORKOMS

OË Dit kan bloedbelope en moeg lyk. As jy saans drink, sal dit ook jou slaappatroon beïnvloed. Jy raak dalk vinniger aan die slaap, maar jou REMslaap sal negatief beïnvloed word.

VEL Drankies dehidreer jou liggaam. Jou vel word ontneem van voedingstowwe en kan mettertyd dof begin lyk. Dit kan ook bestaande veltoestande vererger, soos roosaknee en psoriase.

GELAATSKLEUR Alkohol laat die bloedvaatjies in jou gesig vergroot. Herhaalde vergryping aan alkohol kan permanente skade beteken en are rooi en spinnerakagtig laat voorkom.