SORGE AS JULLE SAAM WOON
Die werklikheid van ’n huis of woonstel deel is dat julle met mekaar se goeie én slegte gewoontes moet saamleef. Julle kan argumente voorkom deur ’n goeie geldgesprek te voel
1 DIE GROOT BEDRAE
Kyk eers of jou potensiële huismaats wel kan betaal. Het hulle ’n vaste, voldoende inkomste?
Deposito Dis gewoonlik een maand se huurgeld, maar kan meer wees. Die verhuurder mag hierdie geld gebruik om skade deur huurders te herstel. Besluit vooraf saam hoe iemand vergoed sal word as hy vroeër uittrek.
Huur Dit kan gelykop gedeel word indien alle huismaats dieselfde geriewe het. Gesels oor verskillende bedrae indien een ’n groter kamer, parkeerplek of eie badkamer het.
Water en elektrisiteit Dit is gewoonlik makliker om die bedrag gelykop te verdeel, maar as een huismaat meer verbruik, kan julle die koste persentasiegewys verdeel.
2 ANDER UITGAWES
Huismaats koop dikwels hul eie kos, maar deel ander huishoudelike uitgawes, soos skoonmaakmiddels en toiletpapier. Besluit watter produkte as gedeelde kostes gesien word en hoeveel julle bereid is om daaraan te bestee. Dinge wat dalk vir jou vanselfsprekend is, kan jou huismaats vies maak.
3 WIE HOU KOP?
Sekere verhuurders aanvaar afsonderlike betalings van verskillende huismaats, maar die meeste aanvaar slegs ’n enkele betaling van die groep.
Kies een geldbestuurder Hierdie persoon kan alle maandelikse betalings doen. Die ander kan dié persoon direk betaal óf hul bydrae in ’n spesifieke rekening teen ’n vasgestelde datum inbetaal.
Hou rekord Die geldbestuurder moet kophou met alle uitgawes, hoeveel elke huismaat skuld, wie wat betaal het, en wanneer. Apps soos Splitwise, Settle Up en Splittr kan julle hiermee help.
Deursigtigheid Elkeen moet al die fakture en betaalstrokies kan sien, en weet hoeveel hulle skuld en wat hulle reeds betaal het.
4 LAAT BETALINGS
Daar moet gevolge wees vir huismaats wat agterstallig raak. Besluit vooraf dat die wanbetaler byvoorbeeld alle boetes vir laatbetalings moet dek of ekstra huistake moet verrig. Kom ooreen wanneer iemand sal moet uittrek omdat hy/ sy vir ’n sekere tydperk nie betaal het nie.
5 SKADE
Die een wat die skade aanrig, moet daarvoor betaal. Dis nie ander huismaats se verantwoordelikheid nie.
6 WIE BETAAL VIR GASTE?
Die een wat gaste kry, moet vir hulle voorsien. Besluit vooraf hoe lank vriende kan bly sodat julle nie met ’n ekstra intrekker sit nie.
7 SIT DIT OP SKRIF
Die ooreenkoms tussen huismaats is nie dieselfde as die huurkontrak wat jy met jou verhuurder sluit nie. Dit moet al julle geldbesluite uiteensit sodat julle nie later daaroor stry nie. Jy het nie ’n prokureur nodig om dit te doen nie, maar dis goed om dit op skrif te stel. Almal moet seker maak hulle verstaan en aanvaar dit.
8 AS DAAR TWIS KOM
Huisvergaderings Die aangewese geldbestuurder moet geldvergaderings kan reël. Dit kan kwartaalliks wees, of gehou word wanneer daar probleme of nuwe uitgawes opduik. Hoe om te stry Wees eerlik as iets jou pla, maar moenie aanvallend wees nie. Hou in gedagte dat jy dalk weer vir ander die onaangename huismaat is. Betrek ’n bemiddelaar, indien nodig.