Waar’s die skoenlapper heen?
onthou haar goed. Altyd so vrolik, jonk en vol lag.
Sy het soos ’n skoenlapper deur ’n wêreld sonder hartseer, depressie of vrees gedartel. Sy het daarvan gehou om in die reën te loop, maar ook die gloeiende son op haar vel met ope arms verwelkom. Haar medikasie het sy van die natuur ontvang. Resies gehardloop, wegkruipertjie of krieket tot saans laat in die straat gespeel.
In die kombuis het sy die velletjie van die kastrol melk op Ma se houtstoof met haar vinger afgeveeg en verslind.
En ek wonder: Is dit regtig sy wat nou uit die spieël na my toe terugkyk? Die bruin hare het grys geword, die ongeduld het gewyk voor nederigheid, geduld en bowenal gelatenheid.
Haar vel is verrimpeld en die son is nou haar vyand teen wie sy haar moet verskans. Die eens wakker oë is dof.
Destyds het sy alles wat voorgekom het met smaak verslind, maar vandag eet sy versigtig en met allerhande voorbehoude. Haar aptyt het dié van ’n voëltjie geword.
Is dit regtig wat voor my staan?
SIELA LIEBENBERG,
JEFFREYSBAAI
WISKUNDE. Kom ons wees nou maar eerlik, dít is nie almal se gunstelingvak nie. Ons hier by Huisgenoot is daarom baie opgewonde om uiteindelik ons wiskundepakket bekend te stel op ons opvoedkundige platform Huisgenoot Junior: Leer en speel!
Dié digitale skoolwerkpakket bestaan uit 20 video’s vir leerders in graad vier, vyf en ses.
In elkeen van die video’s, wat ongeveer agt minute lank is, verduidelik die wiskundeonderwyseres Ischké Felix van die algemeenste konsepte en vrae waarmee leerders dikwels kan sukkel. Daar is ook aflaaibare werkvelle met memorandums wat leerders kan help om die somme te oefen.
Ischké verduidelik breuke, vermenigvuldiging, deling, somme oor tyd, geometriese patrone, omtrek, oppervlakte en volume volledig, stap vir stap op ’n toeganklike manier.
Haar liefde vir klasgee en wiskunde is duidelik in die manier waarop sy die aanbieding doen.
En die beste? Jou kind kan die video’s oor en oor kyk, en weer terugverwys na die video’s as hulle hul geheue volgende jaar wil verfris.
Gaan loer op huisgenootjunior.com. Daar is ook ander nuttige skoolwerkpakkette wat jou kind kan help met huiswerk, mondelinge en skooltake. Die pakkette bevat artikels wat aangevul is met foto’s, infografika en video’s.
Lewensvaardighede, geografie en geskiedenis is saam met wiskunde beskikbaar. En ons is volstoom besig om die natuurwetenskappe-en-tegnologie-pakket ook gereed te kry.
Ek besef dis nie aldag moontlik nie, maar hopelik kan dié pakkette jou vanjaar help om jou ’n klein bietjie minder oor jou kind se skoolwerk te bekommer.