GELDSAKE KOM OP KOERS NÁ SKULDBERADING

Jou slegte skuld is eindelik afbetaal en jy wil weer ’n lening kry. Hier is wat jy moet weet

KRY ’N KLARING1 SERTIFIKAAT

Jou skuldberader moet ’n klaringsertifikaat by kredietverskaffers en die kredietburo’s indien as bewys dat jy jou skuldberading voltooi het.

Maar eers moet:

◗ al jou korttermynskuld vereffen wees;

◗ jou huisverbandpaaiemente op datum wees;

◗ al jou skuldberadingsgelde betaal wees.

DIT VAT TYD, WEES 2 GEDULDIG

Sodra die kredietburo’s jou klaringsertifikaat ontvang, moet hulle data soos verstekvonnisse van jou rekord verwyder.

Gee die proses om jou kredietrekord in ere te herstel minstens ’n maand. Dit kan selfs langer duur.

HERSIEN JOU 3 TERUGBETALINGSREKORD

Ingevolge die Nasionale Kredietwet moet jou skuldbetalingsgeskiedenis vir twee jaar op jou kredietrekord bly. Maar vorige skuldvonnisse teen jou sal nie aangedui word nie.

Gaan jou kredietrekord gereeld by verskillende kredietburo’s na om te kyk of ou vonnisse of verkeerde inligting nie moontlik daarop vermeld word nie. Vra dan die betrokke buro om dit reg te stel, want hulle sal dit nie self doen nie.

MOENIE DADELIK WEER 4 LEEN NIE

Om te verseker dat jou aansoek om nuwe krediet teen die beste voorwaardes goedgekeur sal word, moet jou kredietrekord wys dat jy ’n bestendige betaler is.

As jy baie leningsaansoeke indien, sal dit op jou rekord wys en dalk die indruk skep dat jy desperaat is of nie jou beskikbare inkomste kan bestuur nie.

Hou eerder aan om jou huidige verpligtinge na te kom en doen dan eers later of wanneer dit werklik nodig raak weer aansoek om ’n nuwe lening te bekom.

BEGIN KLEIN AS JY 5 WEER LEEN

Moenie te veel nuwe skuld aangaan wanneer jy jou krediettelling probeer verbeter nie. Kry eerder eers krediet wat ’n klein bedrag is en wat jy maklik kan bekostig, soos ’n klein winkelrekening. Dit sal jou ook help om ’n positiewe rekord op te bou.

Bly ook weg van hoërentelenings, want dis duur om te vereffen.

JOU SKULDHERSIENING 6 MAG NIE TEEN JOU GEHOU WORD NIE

As jy ná skuldberading om nuwe krediet aansoek doen, sal krediteure kyk wat jy kan bekostig en hoe jou betalingsgeskiedenis lyk voor hulle krediet aan jou toestaan. Dit, en nie die feit dat jy onder skuldberading was nie, is die grootste oorwegings.

As jou aansoek afgekeur word, vra onmiddellik hoekom. Wat ook al hulle rede, sien dit as ’n leergeleentheid om jou kredietrekord te verbeter. Hulle sal nie probeer om jou te benadeel nie, maar as jy sukkel om ander betalings na te kom of dit nie kan bekostig nie, is jy vir hulle ’n risiko.

BESTUUR JOU 7 KREDIETREKORD VORENTOE

Jy het nou die kans om ’n goeie rekord op te bou.

◗ Moenie lenings aangaan wat jou weer onder geldelike druk sal plaas nie. Jy moet dit maklik kan afbetaal.

◗ Betaal meer as die maandelikse minimum wanneer jy kan. So vereffen jy jou skud vinniger, jy sal minder rente betaal en aan krediteure bewys jy is ernstig oor goeie geldbestuur.

◗ Moet nooit laat betaal nie. Dit kan tot boetes lei wat jou skuld duurder maak – en jou kredietrekord weer sleg laat lyk.