BETAAL JOU BELASTINGSKULD SÓ

Jy skuld die Suid-Afrikaanse Inkomstediens geld, maar kan nie dadelik opdok nie. Hier is wat jy kan doen

Verlede jaar is 20 derdepartyskuldinvorderaars aangestel om skuld namens die Inkomstediens in te vorder. As jy ’n aanmaning kry, vra die belastingkantoor eers direk ’n balansstaat. Stuur ’n gratis SMS na 47277. Hou jou belastingverwysings- en ID-nommer byderhand. Die belastingkantoor sal dan bevestig of jou naam aan ’n skuldinvorderaar oorhandig is. Dié invorderaars is ook by www.sars. gov.za gelys.

MAAK EERS SEKER DIS NIE ’N SLENTER NIE TREF REËLINGS OM DIT AF TE BETAAL

◗ Bel die Inkomstediens by 080000-7277 of e-pos hulle by sarsdebtmanagement2@sars.gov.za. Jy kan ook jou versoek op eFiling indien.

As jy deur ’n aangewese skuldinvorderaar genader is, kan jy jou versoek deur die invorderaar indien.

Jy moet verduidelik hoekom jy uitstel benodig. Verskaf inligting soos die laaste ses maande se bankstate, onlangse betaalstrokies en bewyse van uitstaande rekeninge. As Jan Taks dit goedkeur, sal hulle betalingsreëlings voorstel. Dit sluit in die verwagte betalingstermyn, jou rekeningsaldo, die betalingsplan se begin- en einddatum, die paaiementbedrag, rente en boetes.

Jy kan vra dat hulle die betaaltermyn of maandelikse paaiementbedrag wysig. Jy sal opsies vir die maandelikse betalings kry, byvoorbeeld ’n elektroniese oordrag, debietorder of salarisaftrekking.

MOONTLIKE KLIPPE OP JOU PAD

◗ Die belastingkantoor sal net jou afbetalingsversoek oorweeg as al jou opgawes ingedien en bygewerk is. Jy sal hulle moet oortuig dat jou finansiële situasie gaan verbeter en dat jy sekuriteit vir jou skuld sal kan gee of dit kan afbetaal.

As jy al voorheen ’n afbetalingsooreenkoms gekry het en dit nie nagekom het nie, sal jy moet verduidelik hoekom nie.

As jy nie die betalingsooreenkoms nakom nie, sal dit tot niet verklaar word en dan sal Jan Taks stappe teen jou neem.

Hoe gouer jy jou aansoek vir ’n afbetalingsreëling indien, hoe beter. Anders gaan jy meer rente betaal.

KAN JY DIE SKULD BETWIS?

Ja. Jy kan ’n dispuut by die Inkomstediens indien. Gebruik eFiling om dit te doen, of kontak die diens se klagtekantoor, kontaksentrum of enige van sy takke. Hulle het 21 werksdae om jou saak op te los. As jy daarna ontevrede is, kan jy die Belastingombud nader. Jy kan aansoek doen dat die skuld tydens die hantering van die dispuut opgeskort word. Word dit toegestaan, mag die belastingkantoor geen invorderingstappe neem tot die dispuut afgehandel is nie.

WAT GEBEUR AS JY NIE JOU BELASTING BETAAL NIE?

Dis ’n kriminele oortreding om nie ’n belastingopgawe betyds in te dien of te betaal nie. Jan Taks kan jou skuld by jou werkgewer invorder, hulle kan jou besittings afvat en verkoop vir die geld of jy kan tronkstraf kry. Betaal dus maar liewer!