’N KOPSKUIF VIR DIE GOUE JARE
Baie mense sien met oorgawe uit na hul aftrede, maar dan kom hierdie langverwagte blaaskans van die dolle gejaag weer met sy eie uitdagings.
Elke lewensfase bring saam met sy vreugdes ook sy eie onverwagte ontnugterings – en dit verg dikwels ’n kopskuif om dit aan te pak.
Dis belangrik om dié fase van jou lewe met die regte ingesteldheid te betree, sê dr. Arien van der Merwe, ’n Pretoriase dokter wat onder meer in holistiese geneeskunde spesialiseer.
Hoe kry jy jou kop op die regte plek?
◗
◗
◗
AANVAAR DIS NIE EENVOUDIG NIE
Alles gaan nie net glad verloop nie. Daar gaan tye wees wanneer jy verlore en alleen voel, en dis normaal. Praat met mense wat jy vertrou oor jou gevoelens, of gaan sien ’n sielkundige of berader. Erken en omarm die kompleksiteit van jou ervaring.
BELEEF DIT MET BEWUSTHEID
Skep vir jouself die ruimte om die nuwe landskap van jou gemoed te verken, en om jou stres en vrese daarin te bestuur. Jy kan dit doen deur meditasie of joga te beoefen, oefening en ander fisieke aktiwiteite te doen, meer tyd in die natuur deur te bring of ’n dankbaarheidsjoernaal te hou. Dit sal jou help sin maak van die oorgang.
VIND ’N NUWE DOEL EN BETEKENIS
Vir baie mense gaan hul werkslewe en loopbaan oor soveel meer as net werk – dit gee ’n doel en betekenis aan hul lewe. Om ’n doel in die lewe te hê gee plesier. Maak werk daarvan om nuwe vaardighede aan te leer of betrokke te raak by nuwe dinge. Hierdie tyd van jou lewe is die ideale geleentheid om terug te ploeg in jou gemeenskap of ander mense by te staan, sê die ekonoom Ulrich Joubert. Jy kan ook as mentor optree vir ’n nuwe geslag en jou kennis en ondersteuning deel. Dit kan in jou goue jare goud werd wees vir ander – en vir jou ’n nuwe gevoel van waarde gee.