THE ILLUMINATED
Die lokprent van die nuwe dokkiereeks The Iluminated gee ’n mens hoendervel. Dis duidelik hier is volledige navorsing gedoen oor die waarheid agter verskillende Suid-Afrikaanse godsdienste en gelowe.
“Elke mens het die behoefte om te behoort en het dikwels ’n leemte wat hulle met geloof wil vul,” sê Wynand Louw, hoof van inhoud by POP24, die produksiehuis wat hierdie insiggewende dokumentêre reeks gemaak het.
“Die reeks se mikpunt is om verskillende gelowe en groepe te ondersoek, en om agter die kap van die byl te kom van wat waar is. Hoekom mense daarin glo en hoekom die publiek soms skepties is oor hierdie groepe.
“Ons kyk nie net na die NG Kerk en die Katolieke Kerk nie, maar ook na ander groepe. Ons gee al die inligting gebalanseerd weer, maar ons skram nie weg van die omstredenheid van sommige van die gelowe nie.”
Elke episode fokus op ’n spesifieke geloof, en dan word daar gekyk na daardie “kerk” en die lede. Kenners word betrek om alles in perspektief te plaas. “Daar is ook baie dele in Afrikaans en dis nie moeilik om te volg nie.”
Wynand sê maande van ondersoek en oorreding het die fliek voorafgegaan om mense sover te kry om openlik oor alles te gesels. “Baie mense wil nie in die openbaar praat oor geloof nie en ook nie oor hoekom hulle dinge glo nie. Soms glo mense in iets, maar hulle kan nie werklik verduidelik hoekom nie. Dit was interessant om tyd saam met van die meer raaiselagtige groepe deur te bring, en te sien waar opregte ideale is en hoe verdraaiing soms plaasvind.”
Jy gaan beslis iets leer en die inhoud met ander wil bespreek.