GEREEDSKAP VIR DIE KWAAI OOMBLIKKE
Geen mens op hierdie aarde raak nie soms kwaad nie. Dis ’n gewoon menslike reaksie gewortel in sterk gevoelens. Boonop kan daardie emosies uiteenlopend wees: vrees, frustrasie, spanning, hartseer. Pyn, ongemak of verdriet verskans hom byvoorbeeld soms as woede.
Jou woede kan spruit uit iets klein, of iets veel groter en meer ingewikkeld.
As jy selfondersoek daaroor doen, kan dit jou help om beter te verstaan wat regtig aan jou knaag of waarmee jy werklik worstel – en daardie insig kan jou dan help om dinge aan te spreek of te verbeter.
Maar as jy jou onderliggende gevoelens nie werklik verstaan nie en toelaat dat woede jou gedrag bepaal, kan dit ’n verwoestende uitwerking hê.
“As jy toelaat dat jou woede buite beheer raak, kan dit jou oordeel beïnvloed en lei tot irrasionele optrede wat jou verhoudings, gesondheid en werk kan raak,” sê Kersha Singh, ’n bestuurder by Netcare Akeso Kenilworth se Centre of Psychotherapy Excellence. Maar sy beklemtoon: “Die goeie nuus is dis nie te laat vir volwassenes om te leer hoe om hul woede te beheer nie.”
Hier is ses eenvoudige dinge wat jy kan doen om jou in die oomblik te orïenteer wanneer woede jou skielik verswelg:
◗ Tel stadig tot 10 voor jy enigiets sê. Moenie
dadelik terugkap nie.
◗ Haal diep asem. In by jou neus vir vier tellings, en dan stadig uit by jou mond. Herhaal dit ’n paar keer.
◗ Verwyder jouself uit die situasie – kamerverlaat help vir kopskoonmaak.
◗ Herinner jouself dis nie nodig om op als te reageer nie.
◗ Doen ’n bietjie oefening voor jy verder oor die situasie dink.
◗ Kry eers ’n nag se slaap in. Skep spasie tussen jou en die situasie voor jy besluit hoe om dit te benader.
Hierdie tegnieke sal jou help om vir jouself ruimte te skep vir selfondersoek en om eers te bepaal wat jy werklik voel en dink. Dit is eenvoudige raad, maar dit skep tyd vir jou om groter begrip vir jou eie gevoelens, die ander party en die situasie te kweek.
Maar dit beteken nie jy moet jou woede net wegwens of onder die mat vee nie. Soms is dit steeds nodig om jou gevoelens en gedagtes te verwoord en die situasie aan te spreek.
Kersha sê die sleutel is om selfversekerd en konstruktief te kommunikeer as jy eers kalmer voel. “Wees bedagsaam wanneer jy die situasie benader.”
Beskou die gesprek as iets wat jy produktief wil aanpak – jy wil misverstande uitklaar en oplossings vind eerder as net blameer en verwyt.
Dan dien jou woede nie as wapen nie, maar as rigtingwyser wat jou help om jou weg te vind.