’N HELPENDE HAND VIR JOU EERSTE HUISIE

First Home Finance is ’n staatsubsidie beskikbaar aan Suid-Afrikaners wat vir die eerste keer ’n blyplek koop. Jy kan terugwerkend aansoek doen en hoef dit nie terug te betaal nie. Dit kan ’n groot hulp wees vir jong mense of mense in laer inkomstegroepe

1 HOEVEEL KAN JY KRY?

Dit wissel van R38 878 tot R169 264. Hoe minder jou inkomste, hoe hoër kan die subsidie wees. Gebruik die glyskaal op die First Home Finance-webwerf ( nhfc.co.za) om te bereken hoeveel jy moontlik kan kry.

2 WAT IS DIE VOORWAARDES?

Dis slegs beskikbaar vir Suid-Afrikaanse burgers ouer as 18, met óf ’n enkele óf gesamentlike bruto huishoudelike inkomste van R3 501 tot R22 000 per maand.

Dit moet jou eerste eiendom wees, en jy mag nie voorheen ’n staatsbehuisingsubsidie ontvang het nie. As jy getroud of in ’n saamwoonverhouding is, moet die eiendom in albei se naam geregistreer wees. Enkellopendes met finansiële afhanklikes kan ook aansoek doen.

Aansoekers moet bewys hul huisleningsaansoek is in beginsel deur ’n geakkrediteerde Suid-Afrikaanse finansiële instelling goedgekeur, of watter ander finansiering hulle het om te koop.

3 WAARVOOR KAN JY DIT GEBRUIK?

◗ Om ’n bestaande huis of woonstel op ’n perseel met munisipale dienste te koop.

◗ Om ’n huis op ’n woonperseel met munisipale dienste te bou. Jy mag nie die perseel deur ’n staatsbehuisingsubsidie verkry het nie. Die bouer moet by die Nasionale Huisbouer-registrasieraad geregistreer wees.

◗ Om oordrag- of verbandregistrasiekoste of ’n tekort op die verband te dek indien die subsidiebedrag gelyk aan (of groter as) die eiendomprys is.

4 WAT IS DIE FINANSIËLE VEREISTES?

Subsidie-aansoekers moet die spaargeld hê of ’n lening kry om die eiendom te koop of bou. Aanvaarbare finansiering is:

◗ Jou eie spaargeld;

◗ ’n Goedgekeurde huislening;

◗ Behuisingslenings toegestaan deur ’n gemeenskapspaarskema, byvoorbeeld ’n stokvel;

◗ Privaat werkgewers met Employer Assisted Housing Schemes (EAHS);

◗ Ongesekureerde huislenings van enige lener wat by die Nasionale Kredietreguleerder geregistreer is;

◗ Pensioengesteunde behuisingslenings toegestaan of gewaarborg deur ’n pensioen- of voorsorgfonds;

◗ In landelike gebiede: behuisingslenings wat ondersteun word deur toestemming-om-teokkupeer-ooreenkomste, soos uitgereik deur staatserkende tradisionele owerhede;

◗ ’n Afbetalingsverkoopooreenkoms of huurom-te-koop-ooreenkoms. Dit is ’n ooreenkoms wat jy met jou verhuurder aangaan om die eiendom wat jy huur te koop.

5 WATTER PAPIERWERK HET JY NODIG?

Gesertifiseerde afdrukke van hierdie dokumente moet aansoeke vergesel:

◗ ID’s van volwasse huishoudingslede;

◗ ’n Huweliksertifikaat waar van toepassing;

◗ Geboortesertifikate vir kinders wat nie ID’s het nie;

◗ ’n Egskeidingskikkingsooreenkoms indien relevant om voogdyskap te bewys;

◗ ’n Hofbevel of bevel uitgereik deur die Kommissaris van Kinderwelsyn om voogdyskap te bewys;

◗ Bewyse van inkomstebronne;

◗ Toestemming-om-te-okkupeer-ooreenkoms vir aansoekers in landelike gebiede;

◗ ’n Beëdigde verklaring van huwelike ingevolge gewoontereg.

6 WAAR DOEN JY AANSOEK?

Die kantoor van die Departement van Menslike Nedersettings; of laai die aansoekvorm op die First Home Financewebwerf af.