SKEP SÓ VIR JOUSELF VREUGDE

Glo dit of nie, geluk is nie net touchy-feely nie – dis iets wat deur geleerdes aan universiteite bestudeer word.

Trouens, navorsers aan die Universiteit van Kalifornië in Berkeley het in 2022 selfs ’n projek genaamd The Big Joy op die been gebring.

Die doel? Om te kyk hoe mense met klein dingetjies vir hulself vreugde kan skep.

“Dit behels oefeninge en aktiwiteite waarmee jy die vaardighede slyp wat jou gelukkiger maak,” sê Emiliana Simon-Thomas, een van die navorsers wat deel is van die projek.

Hul bevindings was verrassend eenvoudig – en dit wys daar is maklike dinge wat jy kan doen om gelukkiger te voel.

◗ WEES OOP VIR VERWONDERING

Wees oop en ontvanklik vir die mooi en spesiale dinge in die lewe. Sien dit raak, en laat toe dat dit jou vir ’n oomblik meevoer.

◗ VIER ANDER SE VREUGDE

Vra uit oor ander mense se goeie ervaringe, en wees saam met hulle bly. Blydskap kan groei as dit gedeel word.

◗ HOU DAGBOEK VAN JOU DANKBAARHEID

Dit klink na die soort ding wat almal sê, maar iets wat niemand doen nie, maar studies wys mense wat doelbewus dink aan die dinge waarvoor hulle dankbaar is, voel meer optimisties oor die lewe. Maak gereeld ’n lysie van die dinge waarvoor jy dankbaar is. Daardie dinge is iets om te vier!

◗ DOEN IETS ONBAATSUGTIGS

Om iets vir iemand anders te beteken, kan baie bevredigend wees – selfs al weet hulle nie eens jy het dit gedoen nie. Gee van jouself – hetsy dit jou tyd, jou aandag, jou talente of iets materieel is. Dis waar wat hulle sê: Om te gee is soms lekkerder as om te kry.