VERMY SÓ LEEFSTYLINFLASIE
Maak daardie langverwagte verhoging geen verskil nie? Dan het jy dalk in die leefstylinflasie-slaggat getrap
WAT IS LEEFSTYLINFLASIE?
Elke keer as jy meer verdien, bestee jy ook meer. Dis nie verkeerd om jou leefstyl te verbeter nie, maar probleme ontstaan indien jy nie terselfdertyd jou spaarbydraes verhoog nie. Leefstylinflasie maak dit moeilik om skuld te delg, te spaar en finansiële doelwitte te behaal.
WAT IS DIE GEVAARTEKENS?
◗ Jy bestee meer aan geriefsgoed of luukshede, maar jou behoeftes en finansiële omstandighede bly dieselfde. ◗ Jy maak op kredietkaarte of lenings staat om jou nuwe leefstyl te handhaaf.
◗ Al verdien jy meer, moet jy raap en skraap van een salaris tot die volgende.
◗ Jou spaargeld groei nie.
HOE VOORKOM JY DIT?
◗ Neem jou finansiële besluite gegrond op behoefte en bekostigbaarheid eerder as begeerte. Moet ook nie pro
beer bybly met die dinge wat ander mense koop nie.
◗ Moenie meer bestee as wat jy kan bekostig net om in te pas by ’n sekere sosiale groep nie. Vir al wat jy weet, is daardie mense diep in die skuld.
◗ Vermy finansiële naïwiteit. As jy nie verstaan hoe belangrik dit is om te spaar en te begroot nie, kan jy meer vatbaar wees vir leefstylinflasie, waarsku die skuldberaders DebtSafe.
◗ Moenie impulsief koop omdat dit jou goed laat voel nie. HOE KOM JY UIT DIE STRIK?
◗ Bereken die ware uitwerking op jou inkomste wanneer jy ’n verhoging of bonus kry. Die netto bedrag ná aftrekkings soos belasting kan minder wees as wat jy verwag het. Beplan hoeveel daarvan jy gaan gebruik vir skuld-, spaar- en leefstyldoeleindes.
◗ Maak geleidelike veranderinge. Ons besef dikwels nie die verborge koste agter groot leefstylveranderinge nie. ’n Groter huis beteken byvoorbeeld hoër versekering, of duurder tariewe en belasting. Dit is dalk meer kostedoeltreffend om jou huidige eiendom op te knap sodat jy eendag ’n hoër prys daarvoor sal kry.
HOE SPAAR JY STEEDS?
◗ Stel duidelike finansiële doelwitte, ook vir die dinge waarvoor jy wil spaar. Sodoende sal jy nie so maklik impulsief bestee nie.
◗ Jy moet doelbewus spaar en belê. Maak dit ’n gewoonte. ’n Onafhanklike finansiële beplanner kan jou help om die regte spaarplan te kies. Sommige effektetrusts van suksesvolle beleggingsmaatskappye begin by ’n beleggingsplan van R200 per maand, met lae administrasiefooie. As jy meer geld in jou bankrekening wil spaar, vra ’n bankkonsultant watter rekeninge die laagste koste en beste rente het.