DIE RAND EN SENT VAN HUISBOU
Huisboukoste gaan oor meer as net die prys van bakstene en sement. Hier is vier dinge wat jy moet weet
BASIESE FAKTORE WAT KOSTE BEÏNVLOED
Ons het by die verbandorigineerder Ooba om antwoorde gaan aanklop.
Ligging: Grondpryse in uitsoekgebiede is gewoonlik duurder. Veiligheid en nabyheid aan skole, winkels en vermaak dra ook by. Ligging speel ook ’n rol in konstruksiekoste. As jy in ’n gewilde gebied of stad bou, kan die groter aanvraag na bouers en konstruksiemateriaal hoër koste beteken. Aan die ander kant kan bouwerk in afgeleë gebiede meer kos weens die gebrek aan infrastruktuur en plaaslike boumateriaal.
Grootte en ontwerp: Hoe groter die gebou, hoe duurder. So ook ingewikkelde ontwerpe wat gespesialiseerde vaardighede en toerusting vereis.
Gehalte van boumateriale: Jou keuse van materiale kan ’n wesenlike impak hê op die algehele koste. As jy dit so goedkoop moontlik doen, kan jy later duur betaal vir herstelwerk. Maar jy kan ook aan luukses oorbestee. Kies dus die beste binne jou begroting.
WAAROP MOET EK NOG LET?
Boukoste per vierkante meter is hoër in sommige gebiede: Dit kan wissel van sowat R10 000 tot R20 000 per vierkante meter. Jy kan die gemiddelde tarief per vierkante meter van munisipaliteite, eiendomsontwikkelaars, boukontrakteurs en bourekenaars kry. Hou dit in gedagte wanneer jy oor ontwerp, grootte en boumateriale besluit.
Koppel van dienste soos water en elektrisiteit: Kry hierdie besonderhede by die plaaslike munisipaliteit.
Spesialis-items en afwerkings: Dit kan vensters, deure, dakke, vloere, kaste, ligte, badkamerafwerkings en werkblaaie insluit. Duursame granietwerkblaaie en hardehoutvloere sal byvoorbeeld jou boukoste verhoog, maar dit kan ook jou huiswaarde verhoog.
Sonkragtoerusting: In baie gebiede word dit noodsaakliker. Sorg dat jy dié uitgawe by jou boukoste inreken.
Professionele fooie vir kundiges: Die dienste van ’n gelisensieerde boutekenaar of argitek, of selfs ’n geoloog of ’n ingenieur indien nodig, sal ekstra kos.
HOE SPAAR EK DEUR SELF TE BOU?
Jy hoef nie hereregte of administratiewe fooie te betaal vir die regsproses nie. As jy ’n goeie bouer en gehalte materiaal gebruik, behoort jy die eerste paar jaar minder instandhoudingsuitgawes te hê.
HOE FINANSIER EK DIT?
Boulenings kan gebruik word om ’n huis op ’n leë erf te bou of ’n bestaande eiendom op te knap. ’n Goeie kredietrekord en ’n deposito sal jou kans op goedkeuring verhoog.
Die bank sal gewoonlik die volgende vra: die voorlopige of goedgekeurde huisplanne; alle spesifikasies vir boumateriaal en afwerkings;
’n bouskedule en voltooiingsdatum; die bouer se beraamde kwotasie; en die boukontrak. Die bouer moet by die Nasionale Huisbouersregistrasieraad (NHBRC) geregistreer wees. Kry ’n lys van geregistreerde bouers by www.nhbrc.org.za.