OP DIE BLOU TAPYT
Akteurs getooi in hul mooiste mooi skitter op die blou tapyt vir die première van die misdaadreeks Plan B.
PLAN B vertel van Ivan Malan (Tim Theron), ’n man met ’n militêre agtergrond, en sy vennoot Paul Schmidt (Arnold Vosloo), wat ’n bendebaas beroof en die Vlammemeisie – ’n kunswerk deur die meesterskilder Vermeer met ’n waarde van €30 miljoen – steel.
Ragel Bergh (Amalia Uys) word deur die glyjakkals Joshua Lansky (Armand Aucamp) uit haar erfporsie geswendel, maar dan laat ’n kunswaardeerder Ragel, Ivan en Paul se paaie kruis . . .
Die draaiboekskrywer, Tertius Kapp, het Deon Meyer se boek van 1994, Wie met vuur speel, aangepas tot ’n reeks van vyf episodes.
Dié reeks is vir hom baie spesiaal, vertel Deon. “Die aanslag is tong-in-diekies. Dis lig, los en lekker. Ek is oortuig daarvan die reeks is heel uniek aan Afrikaanse televisie.”
AMALIA UYS
Sy is in die regte lewe eintlik maar ’n “plaasmeisie”, terwyl Ragel met tye ’n bietjie wilder is as wat sy ooit sou kies om te wees, vertel Amalia.
Tog is daar ook ooreenkomste tussen haar en haar karakter. “Sy is ’n nerd en hou van die klein dingetjies in die lewe – daarmee identifiseer ek veral.”
Haar karakter sal haar altyd bybly, sê Amalia. “Wat die reeks so spesiaal maak, is die uiteenlopende kombinasie van karakters in die rolverdeling. Elkeen het sy eie walk of life – almal is helde in eie reg.”
WANDA BANDA
The Woman King van 2022 het van haar ’n ster gemaak, en van hierdie punt af vorentoe gaan jy Wanda se naam oral sien.
Sy vertolk die rol van die rekenaarfundi Kate. Vir haar was die lekkerste om met so ’n groep ervare akteurs saam te werk.
“Ek is so geïnspireerd deur hulle, veral deur Arnold. Hy het my baie geleer en my altyd verseker dat dit oukei is om foute te maak en jou tyd te vat,” vertel sy.
“Veral as jy jou woorde vergeet!”
TIM THERON
Die akteur en sy vrou, Juanli, het op die bekendstelling geskitter – sy in ’n blou nommertjie, hy in ’n snyersbaadjie met ’n netjiese T-hemp.
“Dit is verskriklik lekker om hier te wees, om die atmosfeer te beleef en om soveel mense te sien,” sê Tim.
Juanli vertel hulle het dié keer hul kinders, Migael (7) en sussie Sophia (10), saamgebring.
“Ons het sommer besluit om ’n lekker Paas-uitstappie daarvan te maak,” sê Juanli.