LENINGS: JOU REGTE EN VERANTWOORDELIKHEDE
Dit kan jou geld spaar as jy eers verskillende kredietopsies vergelyk. Ken hierdie vyf regte en verantwoordelikhede voor jy ’n leningsooreenkoms teken
JOU VYF REGTE 1
Maklik verstaanbare inligting, voorwaardes en fynskrif: Moet niks teken as jy nie alles verstaan nie, maan Wikus Olivier van CreditSmart.
2
Kennisgewing oor die sukses/ mislukking van jou kredietaansoek: Jy is geregtig op redes indien dit afgekeur word.
VOORBEELD: Jou kredietrekord lyk sleg – maar ’n kredietburo het foutiewe inligting aan die leningsmaatskappy verskaf. Dan kan jy ’n dispuut met die kredietburo begin en hulle moet dit binne 20 dae oplos.
3
Voorlopige kwotasie: Volgens wet moet jy ’n voorlopige ooreenkoms en ’n kwotasie kry voor jy ’n ooreenkoms met die kredietverskaffer aangaan. ’n Voorlopige ooreenkoms moet die bepalings en voorwaardes van die kontrak uiteensit. Die kwotasie moet insluit: die leenbedrag; rentebedrag; depositobedrag (indien nodig); terugbetalingstydperk; paaiemente en alle fooie, heffings en rente. Die kwotasie moet vir vyf werksdae geld.
4
’n Gratis jaarlikse kredietverslag:
As jy meer as een aanvra, moet jy betaal, maar die koste is laag. Jy kan dit aanlyn verkry van kredietburo’s soos VeriCred, TransUnion en Experian. Gaan na die Nasionale Kreditreguleerder (NKR) se webtuiste (ncr.org.za) vir die besonderhede van geregistreerde buro’s. Onthou, dis jou reg om foutiewe of vreemde inligting op jou kredietverslag te bevraagteken.
5
Onderhandeling oor betalingsprobleme: Kommunikasie is belangrik, sê Wikus. Praat met jou kredietverskaffer as jy sukkel om betyds te betaal. Jy het ook die reg om vir professionele skuldberading aansoek te doen. Die skuldberader moet die proses vir jou skriftelik uiteensit. Jy moet maandelikse state van jou skuldberader ontvang tydens die proses. Jy is geregtig op redes indien die aansoek misluk.
EN VERANTWOORDELIKHEDE 1
Gebruik slegs NKR-geregistreer
de kredietverskaffers: Sodoende word jy wetlik beskerm en die rente op jou lenings word gereguleer. Moet nooit jou bankkaart, identiteitsdokument of bank-PIN by kredietverskaffers los nie, waarsku Wikus.
2
Wees eerlik oor jou finansies in
leningsaansoeke: Maak ook seker jy sal nog ’n finansiële verpligting kan bekostig.
3
Betaal paaiemente pligsgetrou:
Probeer om die volle maandelikse bedrag te betaal eerder as net die vereiste minimum. So vermy jy onnodige rente en bou jy ’n positiewe kredietgeskiedenis.
4
Praat as jy sukkel: Dis jou verantwoordelikheid om die kredietverskaffer te laat weet as jy oorweldig raak. As jy wag tot hy jou kontak omdat jy reeds ver agter is, gaan hy minder toegeeflik wees.
5
Jy moet betaal al is jy in skuld
berading: Laasgenoemde is nie ’n kitsoplossing of ’n skuldkansellasieproses nie. Praat gereeld met jou skuldberader en hou by die nuwe afbetalingsplan wat hy vir jou beding het.
Ander skuldverligtingsmaatreëls is vrywillige teruggawe, skuldkonsolidasie, skuldadministrasie en vrywillige sekwestrasie. Inligting hieroor is by skuldberaders en die NKR verkrygbaar.