BASINDE NGOKULAMBISA BEPHAPHALAZA EMGWAQWENI
BAPHUME bengenamyocu abaculi beqembu likamasikandi Amageza Amahle engozini yomoto ebehlele ngasehammarsdale, entshonalanga yetheku ezintatha zayizolo ngomgqibelo bephikelele ethekwini.
Okhulumela iqembu, upotso Ngobese, uthi kube nokuphazamiseka kwemoto abebehamba ngayo beyiqembu, yaphaphalaza yashayisa kepha akulimalanga muntu kuleyo ngozi.
“Amaphaphu phansi kubalandeli bethu, unkulunkulu ube nomusa kithi, akekho noyedwa olimele. Kumanje nje sesifikile ethekwini kulo mcimbi esize kuwona,” kusho yena.
Upotso utshele ILANGA Langesonto ukuthi bebeli-11 kwiQuantum, kwathi sebengasebhulohweni elichezukela emgwaqweni oya ehammarsdale, kwaqhamuka imoto ephazamise umshayeli, eyabo yaphaphalaza yayoshayisa izinsimbi.
Iqembu Amageza Amahle selizakhele ugazi ngezingoma zalo ezishaya emhlolweni, futhi lisahlangene alikangenwa ngumoya wokwehlukana. Lidume ngengoma esihloko sithi “Vum vum”.