AKAZENYEZI NGOKUGIDA INGOMA
LUQALE esemncane uthando lokugida ingoma umsizeni Mngadi (37), wasenyavu, emkhambathini maphakathi nekwazulu-natal, ongumsunguli weqembu indlondlo Traditional Zulu Dancers.
Ekhuluma NELANGA Langesonto umsizeni, uthi usungule leli qembu ngowezi-2010. Ubone kuyisu eliphusile ukusungula leli qembu emphakathini ngoba linqanda intsha ekubeni ingene ezintweni ezibhedayo. Uthi kubalulekile ukuba kufundiswe intsha izinto zesintu ukuze izoyazi imvelaphi yayo.
Utshele ILANGA Langesonto ukuthi muhle umsebenzi owenziwa yileli qembu ngoba udonsa amehlo abantu abaningi emhlabeni jikelele.
Uthi sekuvuleke iminyango eminingi ngenxa yokuzimisela kweqembu uma lishaya ingoma njengoba selibuya ukuyonandisa e-italy, nakwezinye izindawo.
“Ukugida ingoma yesintu ngikhule kuyinto ebiyenziwa, nami nje ngiyagida, ingoma ngiyayazi futhi ngiyaziqhenya ngayo. Uthando lokugida nolokushaya ingoma alungivalanga amehlo njengoba ngineziqu zemarine Engineering engizithole ngowezi-2008,” kusho yena.
Uthi yize kunzima ukwenza umsebenzi wakhe wemihla ngemihla nokuhola iqembu ngesikhathi esisodwa kodwa uyakuthokozela ngoba unothando lwezinto azenzayo. Utshele leli phephandaba ukuthi akukho lula ukuhola abantu, yingakho kubalulekile ukuba umuntu abe nesineke futhi abe nothando lwento ayenzayo.
“Iqembu selinandise ezindaweni eziningi lapha eningizimu Afrika nasemazweni angaphandle. Siyaziqhenya ngomsebenzi esiwenzayo ngoba siphakamisa ifulegi lasekhaya uma siyonandisa emazweni angaphandle.
"Kumnandi uma sesihlangene nezinye izizwe ngoba sifunda lukhulu ngamasiko azo kanti nazo ziphinde zifunde ngawethu,” kusho yena.
Ngenyanga edlule uthi banandise ebotswana njengoba bekunedance Festival.
Uthi umsebenzi walo omuhle leli qembu usulihlomulise ngezindondo kanti liqokiwe kuma-south African Traditional Music Awards (SATMA), kungekhona okokuqala. phumelela@ilanganews.co.za