UKHIPHE I-ALBHAMU YE-10 UDUMI
UKHIPHE i-albhamu yakhe yeshumi umculi wokholo okhonzwe kakhulu yizintokazi.
Udumi owongokuzalwa emount Ayliff, e-eastern Cape, obedume ngelikadumi Mkokstad kubalandeli bakhe, ukhiphe i-albhamu esihloko sithi Egameni likajesu.
Udumi owaziwa ngezingoma okubalwa kuzona ethi Mbize ujehova, Mayenzeke, Thula Wazi, Dwala Lami nezinye, utshele ILANGA Langesonto ukuthi i-albhamu yakhe ibophele izingoma zokholo ezinemvuselelo. Uthi kwi-albhamu yakhe usebenze nohlengiwe Mhlaba, ijaziel Brothers nobetusile.
Lo mculi oseneminyaka eli-17 emkhakheni wezomculo, uthi kayikho lula indlela eya empumelelweni kulo mkhakha ngoba uhlangabezana nezihibe.
“Inzima indima yasemculweni. Ukusebenza kwami ngokuzikhandla yikhona okungibeke lapho engikhona namhlanje. Kuyisibusiso esikhulu kimina ukuba ngikhiphe i-albhamu yeshumi kulo nyaka.
"Ngizimisele ukuqopha I-DVD engenazibukeli njengoba ngigubha ukukhipha i-albhamu ye-10. Ngingene emculweni ngimncane ngakhipha i-albhamu yokuqala ngineminyaka eyili-10,” kusho yena.
Udumi ungomunye wosaziwayo emkhakheni womculo wokholo okwaziwayo ukuthi bayazithandela indwangu ikakhulukazi uma kunemicimbi emikhulukazi.
Ulandele uthando lwakhe lwemfashini ngokungena kulo mkhakha njengoba esesungule ilebuli yezimpahla zokugqoka. Uthi ilebuli yakhe yidumi Mkokstad Clothing (DMC), kanti kuyimanje izimpahla sezikhona futhi ziyadayisa.
“Ngibone kuwumqondo omuhle ukuthi ngigxile nakwenye into engiyithandayo ukuyenza. Umculo ngiyawuthanda kakhulu kodwa kubalulekile futhi nokuthi kube khona nokunye engikwenzayo eceleni,” kusho yena.
Utshele leli phephandaba ukuthi ujabulile ngale lebuli yezingubo ayisungulile ngoba ihluke kakhulu entweni ayenzayo.
Uphinde waveza ukuthi usenesitebele sokuqopha umculo okungesakhe ishammah Records esisethekwini, lapho kuzotholakala khona futhi lezi zingubo. Uqhube wathi lesi sitebele usivule ngonyaka odlule kanti usekhona nomculi oyedwa oseqopha ngaphansi kwaso, unathi Sithole naye ocula owokholo.
“Sibone kuwumqondo omuhle ukuba angaqale akhiphe manje noma ekupheleni konyaka kepha akhiphe ngephasika ngonyaka ozayo,” kusho udumi.
phumelela@ilanganews.co.za