KUQHUBEKA IMIBONO ODABENI LUKATHISHA OBHAXABULA ABAFUNDI:
Jabulisile Octavia Shongwe:
KUNZIMA. Ngesinye isikhathi usuke uthi uzama ukumakha umntwana ngoba nawe ungumzali. Cabanga nje, ziphatha amafoni esikoleni ukuze zenze ama-video. Akulula neze ukuba nguthisha - umntwana uyeka ngamabomu ukwenza umsebenzi ngoba azi ukuthi uma umthinta uzokufaka impama, uthule umnike esinye isihlathi. {Uma unguthisha} awushayi ngenhloso yokuhlukumeza kodwa usuke uthi uzama ukumphaphamisa umntwana. Konakele bafwethu.
Dudu Fascod:
ABAWAZI amahlazo esiwabekezelela ezikoleni - kukhona ngisho ezilalana emakilasini uma kuphuma isikole sizibambe kodwa sikufihle lokho ngoba siqhuba ubuzali. Kulungile kukhule nokhula, aze angazisoli lo hulumeni.
Hlalabenza Hlaodi Mlambo:
IZINGANE zisesabisa ngezikhali mihla namalanga, bese kuthiwa siholela khona lokho. Ziningi izigameko zehlela ozakwethu kodwa kuthuleke.
Khanyisile Masotobe Sibiya:
AVE kunzima kulo msebenzi wethu.
Linda Zalisa:
UZAKWETHU uhhulwe ngempama wumfundi emasontweni aphelile kwathuleka. Akaqhubeke uhulumeni. Ngingena ekilasini ngithukwe yilezi zingane mihla namalanga, ezinye zezinhlamba angizazi zichazani, kodwa siyathula sifundise. Uma zifeyila sithwala icala. Ngiyafisa ukwazi ukuthi uhulumeni ulindeleni ngempela uma esisebenzisa ngaphansi kwengcindezi engaka.
Mbusiseni Musa Shezi:
KUNEVIDEO eyasabalala kakhulu lapho ingane yomfana yayihlukumeza uthisha imqukula isho ukumsacaza phansi impela - ngifisa ukwazi ukuthi kwenzakani ngaleyo ngane.
Inkinga wukuthi izingane zalaba (abaphethe) kuhulumeni zifunda ezikoleni ezizimele (private schools), nawe-ke uyazi ukuthi ezikoleni ezizimele akudlalwa, uma ungezwa nje uyaxoshwa. Kulezi zikahulumeni izikole imfundo yakhona ibulawa ngamabomu ukuze abantu abamnyama baphelele kwiwhoonga.
Samke Myeni:
KWENZEKA kanjani ukuthi uma sekuwuthisha oshaye umfundi kusukunyelwe phezulu? Kuthiwani ngalo mfundi (25) oshaye uthishomkhulu ngempama - yenziwe njani indaba yakhe. Nazo lezi ngane azizwa, ziyeyisa zinjalo nje. Kudlalwa ngothisha la.
Miya Mhlakazi Nhlakanipho:
CHA, singakhuluma nje kodwa othisha bayabheda. Umuntu uke asuke ekhaya lakhe nezinkinga, kuthi uma efika ezinganeni akhiphele kuzona ukudinwa kwakhe - lokho akwamukelekile. Akekho okufanele avumele ukushaywa kwengane yakhe ngaleya ndlela noma ngabe kuthiwa ayibhalanga. Mina ngeke eyami (ishaywe kanje), kungamane kufe umuntu. Thulani Thisha: NGATHI inzima impilo yothisha kulezi nsuku, bashaywa yizingane abazifundisayo. Bona uma beqondisa ba- phelelwa wumsebenzi wabo. Le nto yokuvalwa kwenduku ezikoleni iyalibulala izwe. Thina sasishaywa kakhulu futhi wayehlonishwa uthisha noma uhlangana naye emgwaqweni.
Nozipho Zizi Blose:
ZIBASHAYA nje yingoba zisuke sezikhathele wukushawa yibo bese ingane ithi namuhla ngizomushaya nami.
Jstkidding Kaqtalk Mkhwanazi:
UHULUMENI ubulala indlu emnyama. Uma kulwa abafundi kuhle kuye, uma kuwucansi kuhle kuye, uma kuyinsangu badakwe abafundi qede bagwaze othisha kuhle, kanti uhulumeni uqondeni ngekusasa lezingane zethu? Engani thina sasishaywa. Sasesaba ukwenza amahlazo. Uhulumeni usibulalela izingane.
Bongekile Precious:
UHULUMENI ubulala isizwe sakusasa nje kwaphela.
Mbongeni Protas Dlamini:
UFUNA (uhulumeni) ziyogcwala edolobheni lezi zingane zisiphuce lawa masenti esiwajulukela kanzima. Akazithandi nje neze (izingane).
Mancinza Nondaba:
KWAZE kwanzima ukuba nguthisha kule mihla. Ngake ngashaywa ngumemu waze wangifaka phansi kwamathanga wazitika ngami kodwa ngiyambonga ngoba induku yangakha, yingakho nje ngingabanga yiphara.
Nolwazi Mbatha:
BOTHISHA bami, gxilani kwabazimisele ngesikole, ongawenzi umsebenzi muyeke umedlule sengathi akekho ekilasini. Nakani abasebenzayo nishiye phansi onsangwini.
Thando Ngongoma:
INKINGA wukuthi uma enganakwa unsangwini uzofeyila bese ukufeyila kwakhe kubuzwe kuthisha. Kunzima nkosi yami. Ngiyamzwela lo thisha ngoba inhloso yakhe bekungekhona ukulimaza umfundi, kodwa ubezama ukubaqondisa, ababuyise endleleni.
Mathenji Du Mshengu:
ANGIVUNI izingane, futhi angivuni othisha, kodwa ngifisa inkosi ingibeke eminye iminyaka engama-20 ngibuke ukuthi ukuthi kuyobe kunjani - kuyobe kuphaswa kodwa ezikoleni noma abafundi bayobe befundisa othisha. Siyoke sibone, nawa amehlo ekake umbombo.
Nthabiseng Molefe:
NAMI mtakamshengu (siyoke sibone), nawa esphundu. Uhulumeni wethu olandelayo kuyobe kuyiphara.
Syabonga Ntuthuko Biyela:
UYAZI kwenzeka izinto ezixakayo eningizimu Afrika. Kunabantu okufanele engabe bayaxoshwa kodwa akwenzeki lokho, kodwa bese kuthi laba abangenzi izigameko ezethusayo beyaxoshwa. Thina ezikoleni sasishaywa manje lezi ngane zidelela othisha zifika ngesikhathi ezisithandayo, ziyazenzela nje. Kunabantu abanenkohlakalo kodwa abenziwa lutho. Kunabadayisa izidakamizwa, babulala ikusasa lazo lezi zingane kodwa abenziwa lutho kodwa bese kuthi lowo ozamela zona lezi zingane ikusasa elingcono axoshwe.
Vuyisanani Ntshongweni:
UYAYIBONA-KE le nto yamalungelo abhedayo! Angivumelani nokuthi abantu bahlukunyezwe kepha induku yiyona ekwenza uqikelele ukuthi uthisha uyamhlonipha futhi ulangazelele nokuphasa isifundo sakhe.
Bryan Ngongoma:
KUNZIMA. Yena ungqongqoshe, futhi mhlawumbe nabo bonke abasephalamende bafakwa endleleni ngesikhathi befunda kodwa manje izingane azisafakwa endleleni. Zenza kube nzima kothisha ukuzifundisa. Akekho ozitshela amaqiniso ngenkinga yokuswela umsebenzi, futhi aziboni ukuthi abazali bazo bazama kanzima kanjani ukuzodla, bazigqokise.
Lindo Sithole:
IBUHLUNGU le nto eyenzeka kothisha. Mina ngafunda kulesi sikole. Saqondiswa izigwegwe. Ngenxa yalokho ngowezi-2005 isikole sethu saba ngesinye sezaphuma phambili esifundazweni nasezweni lonke. Ngangikhona ukuyokwamukela indondo kungqongqoshe wezemfundo Kwazulu-natal. Ngiyilokhu engiyikho namhlanje ngenxa yesandla sothisha basokumhlophe. Ngesikhathi sethu, abazali bebengenankinga nokufakwa kwethu endleleni ngale ndlela. Ngokwami angikaze ngikubone lokho njengokuhlukumeza.
Minenhle Lovemore Joseph:
SIYABONGA Mhlonishwa Dlungwana, baningi abenza lo mkhuba ngenkani, siyethemba bazothola isifundo. Asiqine isigwebo kumaphikankani angawuhloniphi umthetho womnyango, sibonga kakhulu kwiphepha ILANGA ngomsebenzi omuhle osekukaningi liwenza wokulandela izinto ezinjengalezi, liziveze obala lisazise nangazo. Nawe Mthobisi, qhubeka nomsebenzi wakho omuhle wokusiqoqela esidinga ukukwazi. Uphile nje.
Thabie Mthembu:
ZIZOMKHUMBULA kodwa izingane umem oxoshiwe ngoba ubengalwi nazo. Kwakhona nje ukuphatha ifoni kuyiphutha kubantwana bethu, buka manje inyakanyaka eyenzekile. Umem ubesebenza njengomzali, elungisa iphutha enganeni. Uyabonakala ukuthi unabo abantwana futhi ubengeke abashayele ukubalimaza kodwa-ke sekwenzeke kanje. Kunzima ukufundisa, thina ngezikhathi zethu sasingalali senza umsebenzi wesikole sigweme ukushaywa.
Siphesihle Mdluli:
HHAY’ engabe induku yabulala bani. Nathi sifunde khona Okumhlophe, sishawa kodwa asifanga, sisaphila nje. Ukuthi abazi lutho abantu ngenkinga esibhekene nayo ezikoleni. Azisekho izingane, yizilwane, ziziphethe, azifuni ukwenza umsebenzi kodwa zifuna ukuphasa.
Freddie Freddie:
KUNZIMA kothisha, uhulumeni ngicela ake ayibuyekeze le ndaba yezingane before athathe isinqumo. Lo thisha ungubaba wabantwana -njegoba esemyekisa umsebenzi, izingane zizodla ini? Izingane zakhiwa yinduku, nathi sakhula ngayo.
Kumanje lezi zingane zigcwele emgwaqweni ngenxa yokuthi azisashaywa. Nasemakhaya zihluleka nokupheka ukudla ezizokudla, into eziyaziyo yizidakamizwa.
Thokozani Mthembu:
ASISHO ukuthi azingashaywa izingane kodwa kumele zishawe ngendlela eyakhayo khona zizowabona amaphutha azo. Mina angihambisani nokushaywa kwezingane ngendlela enokuhlukumeza.
Thandoe Luthuli:
BAHLULWA wukuxosha amasela antshontsha imali yentela, bagxumela into engathi shu. Engani nathi sasishawa asifanga - ingane yinto yokubhambabulwa ngenduku vele ukuze ivuleke ingqondo.
Phumzile Dlamini Nzimande:
MINA ngafunda khona Okumhlophe. Cha isibhaxu sikhona kodwa sangakha mina. Okunye wawubona nje ukuthi cha besebeqisa, kodwa sadlula kunzima saphila. Yebo othisha kuyobasiza esikhathini samanje ukuba balandele umthetho.
Hlalabenza Hlaodi Mlambo:
SITHWELE kanzima. Siyathula siyabuka iziphathimandla sidakwa yi-aircon bese zenza izinqumo ezivuna uhlangothi olulodwa.
Sipho Qwabe:
YINGAKHO izinga lemfundo kulesi sifundazwe liyihlazo kangaka, alikezushintsha futhi uma kusaqhubeka ngale ndlela.
Czay Makaziyanda Ckhey:
UPHUNYUKILE uthisha, makaxolelwe abuyele esikoleni. Ubeyakha ingane.
Qhoshangani Zinqe:
AMAJAZI mawagcwale umoya. Nathi sashaywa esikoleni kodwa hhayi ukubhaxabulwa sengathi ushaya imbongolo. Ayasebenza amafoni, okwenzeka esithe kuyavela.
Phumlani Muthwenyongo Langa:
UMNYANGO wezemfundo kumele njalo okwenza esandleni sobunxele ukwenze nakwesokudla ngoba nabafundi bayabashaya othisha kodwa asizizwa izinqumo ezifuze lesi.
Nhlakanipho Bee:
MAKAZIFUNDISE yena lo oxosha abantu. Naye kodwa wakhula ngenduku.
Hadebe Mahlophe Makankosi:
INGANE iyashaywa kodwa hhayi kanje. Uyishaye kabi impela, ubeselwa phela yena sengathi ushaya umnakwabo.
Sithandile Mlambo:
NGEKE ziphinde zilunge lezi zingane ngoba zinoyise uhulumeni. Thina sashaywa esikoleni nasemakhaya futhi asibasoli ababenza lokho kithi ngoba konke okuhle esikuzuzile empilweni kungenxa yokuthi babengasincengi besifaka induku noma kuphi lapho sihamba khona siyahlonipha.
Mary Simelane:
BAXOSHENI nje othisha kodwa izingane zethu azizwa, kwanathi bazali ziyasehlula. Kusho ukuthi izwe lizogcwala izigebengu uma zingathuswa izingane.