EZOTHANDO:
NAKUBA kuyingosi yothando lena kodwa namhlanje ngithanda ukukhuluma ngenhlonipho.
Phela ukuzihlonipha kuyahambisana nothando - yizinto ongeke uzehlukanise lezi.
Inhlonipho-ke ibaluleke kakhulu njengoba nebhayibheli lisho ukuthi “hlonipha uyihlo nonyoko ukuze izinsuku zakho zande ezweni.”
Ngiyacabanga ukuthi lo mbhalo awuqondile ukuthi hlonipha abazali bakho kuphela, kodwa usivezela nje ukuthi inhlonipho ingakuhambisa ibanga elide empilweni.
Indaba yenhlonipho iqala kuyena qobo umuntu - kufanele uzihloniphe wena kuqala ukuze ukwazi ukuhlonipha abanye abantu. Ukuzihlonipha kukwenza uhlonipheke nawe.
Indlela umuntu aziveza ngayo kubantu yiyona ndlela abazokubuka ngayo futhi bakwemukele ngayo.
Omunye umbhali, urobyn Trask, endabeni emfushane ayibhalile yashicilelwa kwibeyond the Bedroom naye uyakufakazela ukuthi ukuzihlonipha kuqala kuyena umuntu uqobo. Uthi ngaphambi kokuba uhloniphe ngempela omunye umuntu kufanele uqale uzithande, uzihloniphe wena.
Uthi ukuhlonipha abanye abantu kusho ukuthi uyabalalela uma bekhuluma. Omunye ungoti udkt Peter Gray uthi ugcizelela ukuthi inhlonipho kumele iqale ekhaya umuntu esakhula.
Uthi uthando aluyilutho ngaphandle kwenhlonipho. Udkt Gray uthi uthando aluyona yonke into esiyidingayo. Omunye futhi umbhali u-ebukun Gbemisola Ogunyemi, usho okufanayo nodkt Gray, uthi uthando aluyona yonke into edingwa ngumuntu, uthi uma lungahambisani nenhlonipho luyingozi, lungamdicilela phansi omunye umuntu.
Lo mbhali wexwayisa abantu ngokuthi ungalinge uhlale othandweni ngoba nakhu umuntu ehlale ekutshela ukuthi uyakuthanda kodwa ebe ekuhlukumeza, engakuhloniphi. Uthi ngaphandle kwenhlonipho uthando aluyilutho. sandile@ilanganews.co.za