UZOKWETHULA ALUZWA EGAZINI
“LOLU hlelo ngingasho nje ukuthi luyimina, lugcwele intokozo, wumsindo nokuhlanya,” kusho untando Duma ( osesithombeni) ozokwethula uhlelo olusha olubizwa ngegqom Nation oluzotshengiswa esiteshini sikamabonakude, IMTV Base ( channel 322).
Uthi kulolu hlelo kuzomenywa wonke umuntu othintekayo emculweni wegqomu njalo ngolwesihlanu, okubalwa kubo UDJ Thukzin, irude Boys idistruction Boys nabasathuthuka.
“Sizobe siveza ukuthi igqom ivelaphi, yaqalwa kanjani nokuthi idanselwa kanjani ngoba inendlela yakhona edanselwa ngayo,” kusho untando.
Kulo msebenzi wokuba ngumethuli wohlelo uthi akasiyena umafikizolo kuwona njengoba eke waba ngumethuli kwicraz-e futhi ubuye abe ngumlingisi kwiRhythm City. Uthi ukuba yingxenye yalolu hlelo ukujabulele kakhulu futhi ufunde okuningi.
“Ngiyawuthanda umculo wegqom, ngiphefumula yona, ngiphila yona.
"Kube yintokozo ukuba ngethule uhlelo lwayo. Bekungathi angikho emsebenzini indlela obekumnandi ngayo ngesikhathi sishutha kodwa-ke bekusetshenzwa,” kusho yena.
Useke wakhipha ingoma apike kuyona ubabes Wodumo nomampintsha ethi “Jiva Phez’kombhede.” Nokho uthi akazimisele nakancane ukuba agxile emculweni.
“Ukwenza leya ngoma bekuwukwenza nje ngoba ngenzela ukuthi ngibe nemali ngesikhathi samaholide futhi ngizijabulisa. Njengamanje sengiwumama, ngeke ngisakwazi ukuba ngenze yonke into.
"Into engisuke sengiyikhethile ukuthi ngiyenze ngisuke ngizogxila kuyona,” kusho yena.
Ekhuluma ngokuba ngunina kasbahle okuyindodakazi yakhe nojunior De Rocka, uthi kayikho into ayithokozela njengokuba ngumama.
“Angazi ngingakufanisa nani, kungishintshile ukuthola ingane Yonke into sengiyibuka ngeso elihlukile.
"Sekukhona izinto engizenzayo nengingazenzi ngoba kumele ngibe yisibonelo esihle endodakazini yami. Ngingasho nje ukuthi sengikhulile.
"Uma ngiphuma emsebenzini ngisuke sengifisa ukuba phambi kwengane yami, ngiyibone imamatheka, ayikho injabulo edlula leyo kimina,” kuphetha yena. tzondi@ilangfanews.co.za