UBUYA NGESINYE ISIGQI UWINILE
INTOKAZI eyaziwa kakhulu njengengxenye yeqembu elithandwa kakhulu kumasikandi, Amatshitshi Amhlophe seyingene shi kwisigqi somculo we-afro Pop.
Uwinile Sibiya uthi ufuna ukutshengisa ikhono lakhe ukuthi kaligcini kumaskandi kuphela, uyakwazi ukungena agamanxe nakwezinye izinhlobo zomculo.
“Umaskandi angiwushiyile kodwa ngifuna ukuveza ubuchule bami. Phela thina baculi bakamaskandi sijwayeleke ngokuthi sigxila emculweni wethu kuphela nokuyinto enhle. Kubalulekile ukutshengisa ukukhula njengoba abaculi abenza izinhlobo ezihlukile zomculo bekwazi ukwenza owethu umculo kamaskandi,” kuchaza yena.
Le ntokazi edume kakhulu isacula namatshitshi Amhlophe obekuyiqembu elingaconsi phansi kumaskandi, ithi yize ibicula umaskandi kodwa beyivele izifela ngezinye izinhlobo zomculo. Uthi kwi-afro Pop ubezithandela uzahara no-unathi.
“Umuntu ongenze ngawunaka yilo ongu- producer wami njengamanje uscelo Hlongwane, ubelokhu engitshela ukuthi angathanda ukuba senze i- album ye-afro Pop kodwa kwayinto engingayinaki, walokhu engicela. Ekugcineni ngigcine ngivumile njengoba simatasa estudiyo sipheka yona le album,” kuqhuba yena.
Uthi uma kuphela inyanga yotha- ndo okuwunhlolanja uzobe eseyidedela i- album.
“Abalandeli bami mabalindele lukhulu, ngiphethe okumnandi kodwa. Umculo onomyalezo kuphela, ngicela bangeseke kulolu hambo olusha,” kuqhuba yena.
Uwinile uzigqaja ngokuthi ungumculi wokuqala kumaskandi ukuthi acule i-afro Pop uthi futhi uyazi ukuthi uzoba ngowokugcina.
“Umculo usegazini kimina. Yingakho ngikwazi ukuthi ngincelise amawele, ngishaya umaskandi neAfro pop ngesikhathi esisodwa.
"Uma ngingenzi lutho oluthinta umculo kuvele kube sengathi kukhona lapho ngigula khona,” kuphetha yena. tzondi@ilanganews.co.za