Isilomo sedowns sifake isicelo sokushiya
Uthabo Nthethe kuthiwa ufuna ukujoyina ibucs
UMDLALI obeyisilomo esafika kwimamelodi Sundowns usefake isicelo sokukhululwa kule kilabhu ecijwa ngupitso “Jingles” Mosimane ukuze ajoyine i-orlando Pirates.
Inkontileka kathabo “Mr Cool” Nthethe oyisitobha sedowns iyaphela uma kusongwa isizini.
Idowns isizivuselelile izinkontileka zabanye abadlali kodwa kayithi vu ngeyakhe.
Leli phephandaba lihoshe ngemithombo yalo engaphakathi kwiDowns ukuthi unthethe ufake isicelo kumengameli wale kilabhu, upatrice Motsepe, ngeledlule ukuba amkhulule ngoba vele uyabona ukuthi akasekho ezinhlelweni zikamosimane njengoba engasamudlalisi.
Kuthiwa umotsepe umkhombe kutrott Moloto osebenza ehhovisi lakhe wathi nguyenza onganquma ngaye. Nokho kuthiwa nomoloto umkhombe kumosimane wathi nguyena okufanele anqume.
“Ukujoyina kukanthethe ibucs kulele kumosimane, nguyena okufanele anqume ngaye. Usifakile isicelo futhi wangafihla ukuthi ufuna ukuya kwipirates. Inkinga wukuthi isundowns ifuna ukuthola imali ngaye kanti ibucs yona ime ngokuthi uma nje engafika nephepha lakhe izomsayinisa. Umosimane kulindeleke ukuba enze isinqumo ngaye maduzane, kodwa umanqika ukumdedela manje njengoba urivaldo Coetzee engakalulami,” kusho lo mthombo osebenza ngaphakathi kwidowns.
Leli phephandaba lishayela uthulani “TT” Thuswa wezokuxhumana kwisundowns ngalolu daba, uthe:
“Okwamanje akukho engingakuphawula ngoba udaba oluthinta unthethe alukapheleli.
"Cishe kuzokuba khona okuphathekayo ngokuqala kwesonto.
"Okwamanje angikwazi ukusho into engaphelele ngoba ngumqeqeshi onquma ngabadlali.”