Umdonsiswano ngomcimbi wamahlaya
Ugrootboom usolwa ngokwesula ngenxa yophenyo
SEKUQUBUKE indida ngobunikazi bomcimbi wamahlaya wodumo ethekwini obizwa ngokuthi yi-99% Zulu Comedy njengoba kungacaci ukuthi ngempela ngokabani.
Kuleli sonto umasipala weTheku utshele ILANGA
Langesonto ukuthi lo mcimbi ngowawo (umasipala) kodwa umnu Monwabisi Grootboom ongumnikazi WEWOW Entertainment, uthi ngowakhe.
Umnu Grootboom wayengomunye wabaphathi kulo masipala kodwa washiya emsebenzini eminyakeni eyisihlanu edlule. Kuthiwa wesula emsebenzini ngemuva kokuba kuqale uphenyo ngokuhlela kwakhe imicimbi ye-99% Zulu Comedy ebixhaswe wumnyango abesebenza ngaphansi kwawo kumasipala.
Umthombo waleli phephandaba usola ukuthi umnu Grootboom wahamba ngoba ebona ukuthi lolu phenyo luzomgojela.
Lezi zindaba zivela ngemuva kodaba olushicilelwe YILANGA
Langesonto ngeledlule lapho umnu Grootboom ebekhala khona ngokuthi kunezikhulu kumasipala wetheku ezizenza "onkulunkulu" ngemali yabakhokhi bentela.
Uphinde wakhala nangohlelo lwe-essence athe kaliwenzeli lutho umphakathi waleli dolobha njengoba kuhamba imali yabakhokhintela iyiswe phesheya, ngaphandle kwesidingo.
“Baningi abebehlale bezibuza ukuthi wenza kanjani ukuba enze lo mcimbi obuxhaswa wumnyango abesebenza kuwona.
"Kuthiwa ubethi i-99% Zulu Comedy iwuhlelo lukamasipala lokuthuthukisa umkhakha wamahlaya kuleli dolobha,” kusho umthombo wesibili okhulume naleli phephandaba.
Umnu Thembinkosi Ngcobo oyinhloko yomnyango wezamapaki, ezokungcebeleka, ezamaciko namasiko nezemidlalo namathuna ngaphansi kwalo masipala, ethintwa ukuze aphawule ngalolu daba, uthe ngeke akwazi ukudalula ukuthi umnu Grootboom ubephenywa noma cha ngaphambi kokushiya kwakhe kulo masipala.
“Kuwudaba lwangaphakathi lolo, ngakho ngeke sikwazi ukuludalulela abamaphepha,” kusho umnu Ngcobo.
Uqhube wathi kumdumazile okushiwo ngumnu Grootboom KWILANGA Langesonto ngeledlule.
“Okubuhlungu wukuthi ukhuluma kanje uyalazi iqiniso njengoba kunabantu abebekhala ngaye ngesikhathi naye esasebenzela umasipala. Uyalazi iqiniso ukuthi kungani izinto zakhe zingaxhaswa,” kusho umnu Ngcobo.
Mayelana nokuthi i-99% Zulu Comedy ngekabani umnu Ngcobo uthe ngekamasipala wetheku, akusiyona ekamnu Grootboom.
“Uqale lolu hlelo esebenzela umasipala, okusho ukuthi singaqhubeka nalo ngaphandle kwakhe,” kusho umnu Ngcobo.
Uqhube watshela leli phephandaba ukuthi ubengazi ukuthi amathikithi alawa mahlaya abedayiswa, kodwa ubazi ukuthi kungenwa mahhala ngoba kusuke kukhishwe imali kamasipala.
Umnu Grootboom eziphendulela, uthe akanalo ulwazi ngophenyo oluthinta yena kulo masipala.
“Ngokwazi kwami ngazishiyela kahle kumasipala ngenhloso yokuqhubeka nezinto zami eziseceleni,” kusho umnu Grootboom oshiye lo masipala eminyakeni eyisihlanu eyedlule.
Mayelana nokuthi ngekabani i-99% Zulu Comedy, uveze ukuthi ngeyakhe futhi nezikhulu zikama- sipala ziyakwazi lokho.
“Ngaphumela obala ngala mahlaya njengoba abehlelwa yinkampani yami I-WOW Entertainment. Akekho noyedwa usomahlaya obekhokhelwa ngumasipala uma ngimumemile kulawa mahlaya,” kusho yena.
Uthi ubevele azi ukuthi udaba lwakhe lwangesonto eledlule luzosusa ukukhuluma futhi usamile kulokhu akusho mayelana nezikhulu zalo masipala.